KANAAN jamana dugu caaman labɛnnin lo sisan ka Israɛl kɛlɛ. U b’a miiri k’u bena see sɔrɔ a kan. Nka Gabawɔnkaw (Gabaŋɔnkaw) tun tɛ o miiri, u ka dugu yɔrɔ tun man jan. U tun lanin b’a la ko Ala be Israɛldenw dɛmɛna, ani u tun t’a fɛ ka Ala kɛlɛ. O la do, i y’a lɔn olu ye min kɛ wa?

U y’a latigɛ k’u yɛrɛ kɛ i n’a fɔ mɔgɔ minw bɔra fɔɔ yɔrɔ jan. O kama, cɛɛ dɔw ye fani faranfaranninw ni sanbara tiɲɛninw don. U ye bɔrɔ kɔrɔw ta k’u la u ka faliw kan ani ka buru kɔrɔ janin dɔw ta. U tagara Zozuwe fɛ k’a fɔ a ye ko: ‘An bɔra jamana dɔ la min yɔrɔ ka jan kosɔbɛ, katuguni an ye aw ka Alaba, Jehova koo mɛn. A ye koo minw bɛɛ kɛ aw ye Misira, an y’o mɛn. O kama, an kuntigiw y’a fɔ an ye ko an ka dumunifɛn dɔw ta tagama kama ani ka na a fɔ aw ye ko: “An ye aw ka jɔɔnw ye. Aw ye kali an ye ko aw tɛna an kɛlɛ.” A filɛ sira janya kosɔn an ka faniw faranfaranna ani an ka buru kɔrɔla ani ka ja.’

Zozuwe ni jama kuntigi wɛrɛw lara Gabawɔnkaw ka kuma na. O la, u kalila ko u tɛna u kɛlɛ. Nka tile saba o kɔ, Israɛldenw y’a mɛn ko Gabawɔnkaw yɔrɔ man jan u la.

Zozuwe y’u ɲininga ko: ‘Mun na aw y’a fɔ an ye ko aw bɔra yɔrɔ jan?’

Gabawɔnkaw y’a jaabi ko: ‘An y’o kɛ sabu an y’a mɛn ko aw ka Ala Jehova ye layidu ta ko a bena Kanaan jamana bɛɛ di aw ma. O kama, an siranna ko aw bena an faga.’ Ayiwa, Israɛldenw tun kalila min na, u y’o kɛ, u ma Gabawɔnkaw faga. Nka, u ye u kɛ u ka baaradenw ye.

Zeruzalɛmu masacɛ dimina sabu Gabawɔnkaw ye bɛɛn sigi ni Israɛl ye. O kama, a y’a fɔ masacɛ naani ye ko: ‘Aw ye na ka ne dɛmɛ ka Gabawɔnkaw kɛlɛ.’ O masacɛ duuru tagara ka Gabawɔnkaw kɛlɛ. O la do, yala Gabawɔnkaw ye hakili ɲuman lo sɔrɔ ka bɛɛn sigi ni Israɛl ye wa? An bena o lajɛ maana nata la.