HETA siuda oĩva Canaánpe ojeprepara koʼág̃a oñorairõ hag̃ua Israel ndive. Haʼekuéra oimoʼã oganataha. Péro umi hénte oĩva Gabaónpe ndeʼíri upéva. Haʼekuéra oguerovia Ñandejára oipytyvõha isrraelitakuérape, ha noñorairõséi Ñandejára kóntrape. Upévare, ndépa reikuaa mbaʼépa ojapo umi gavaoníta?

Heʼi guaʼu oikoha mombyryeterei. Upévare oĩ omondéva ao osoropáva ha sandália tujakue. Omoĩ hymba vurrokuéra ári vosa ivaipámava ha ogueraha pán tuja hatãmbámava. Upémaramo oho Josué rendápe ha heʼi: ‘Roju peteĩ tetã opytávagui mombyryeterei, pórke rohendu Jehovágui, pe Ñandejára guasuete peguerekóva. Rohendu umi mbaʼe ojapovaʼekue penderehehápe Egíptope. Upévare ore ruvichakuéra heʼi oréve roprepara hag̃ua tembiʼu ha roju roʼe peẽme: ‘Ore pene rembiguái. Pepromete oréve napeñorairõmoʼãiha orendive’. Pehecha mbaʼéichapa ore ao osoropa ha ore pán ituja ha hatãmbáma pe viáhe pukúgui’.

Josué ha umi líder oĩva hendive oguerovia umi gavaonítape. Upévare opromete chupekuéra noñorairõmoʼãiha hendivekuéra. Péro, tres día haguépe oikuaa umi gavaoníta oikoha ag̃uieténte.

‘Mbaʼére piko pejéraʼe pejuha peteĩ tetã mombyry opytávagui?’, oporandu Josué.

Umi gavaoníta okontesta: ‘Pórke ojeʼe oréve pende Dios Jehová oprometehague omeʼẽmbataha peẽme Canaán. Upévare rokyhyje orejukapárõ g̃uarã’. Péro umi isrraelíta okumpli ipromésa, ha ndojukái umi gavaonítape. Upéva rangue oñemohembiguái hesekuéra.

Jerusalenpegua rréi ipochy umi gavaoníta oñemoĩ porã haguére Israel ndive. Upévare heʼi cuatro rréipe: ‘Peju chepytyvõ ha ñañorairõ Gabaón ndive’. Ha umi cinco rréi ojapo upéva. Iñarandúpa umi gavaoníta oñemoĩ porã haguére Israel ndive, oĩgui koʼág̃a umi rréi oúva oñorairõ hag̃ua hendivekuéra? Jahechami.