Ovagibeon ozonongo
EHUNGI 48
Ovagibeon ozonongo
OVIHURO ovingi mu Kanaan nambano mavi rirongerere okukarwisa Ovaisrael. Owo mave ripura kutja mave taara. Nungwari oviwaṋa vyotjihuro tjopopezu, Gibeon, kavi nakuripura nao. Owo ve nongamburiro kutja Mukuru ma vatere Ovaisrael, nu owo kave nakuvanga okurwa kuna wo. Ove mo tjiwa kutja Ovagibeon va tjita tjike?
Owo va tya okutjita aayo va turire komahi wokokure. Okutja tjiva vovarumendu va zara ozombanda nḓa tauka nozongaku nḓa kurupa. Owo va twirika omakutu nga kurupa kousino wawo, nave toora ozomboroto ozonguru nu nḓa kukuta. Okuzambo va ya ku Josua nave tja: ‘Eṱe matu zu kehi rokokure, mena rokutja twa zuva ohunga na Mukuru weṋu omunene, Jehova. Eṱe twa zuva oviṋa avihe mbye mu tjitira moEngipte. Okutja ovanane vetu ve tu raera kutja ngatu rongerise ovikurya vyouyenda nu tu yende nu tu yekutja ku eṋe: “Oweṱe ovakarere veṋu. Tu yaneneye kutja kamu nakuturwisa.” Tareye ozombanda zetu tji za tauka mena rouyenda oure nozomboroto zetu tji za kurupa nokukuta.’
Josua novanane varwe va kambura mOvagibeon. Okutja ave tjiti oruyano kutja kave nokuverwisa. Nungwari omayuva yetatu kombunda yanao owo va zuva kutja Ovagibeon tjiri va tura popezu.
Josua we ve pura: ‘Omena ratjike tjimwe tu raere kutja mwa za kehi rokokure?’
Ovagibeon va zira ave tja: ‘Eṱe twa tjita nao mena rokutja eṱe twa raerwa kutja Mukuru weṋu Jehova we mu kwizika okuyandja ehi raKanaan ndi ku eṋe. Mena ranao eṱe aatu tira kutja mamu tu zepa.’ Nungwari Ovaisrael va ṱiza oruyano rwawo, nu kave zepere Ovagibeon. Moruveze rwanao ve ve ririsa ovakarere vawo.
Ombara yaJerusalem ya pindika mena rokutja Ovagibeon va tjita ohange kuna Ovaisrael. Okutja eye wa raera ozombara zarwe ine a tja: ‘Indjeye mu ndji vatere okurwisa Gibeon.’ Okutja ozombara ndano nḓa ze rikuta kumwe okurwisa Ovagibeon. Indjo tu katare kutja Ovagibeon va raisa ozondunge mokutjita ohange kuna Ovaisrael.
