KANA’ANIP nunaani illoqarfippassuit Israelikkunnut sorsunnissaminnut piareersarput. Isumaqarput ajugaasinnaallutik. Inuilli illoqarfimmi ungasinngitsumi Gibeonimi najugallit taamatut isumaqanngillat. Isumaqarput Guuti Israelikkunnik ikiuisoq, Guutimullu akiuukkumanngillat. Taava Gibeonimiut qanoq iliortut nalunngiliuk?

Aalajangerput ungasissorsuarmi nunaqartuusaarniarlutik. Angutit ilaat nungullarnikunik atisalerput aloqutilerlutillu. Siutituujutitik puunik nungullarnikunik nammakkersorpaat, iffianillu panertunik oqunnikunik tigusillutik. Taava Josuamukarput oqarlutik: ’Nunamit ungasissorsuarmit aggerpugut, Guutersuarsi Jehova tusaamaleratsigu. Egyptenimi ilissinnut qanoq-iliorneri tamaasa tusarpavut. Taamaattumik siulersortitta peqquaatigut taqusserluta aallaqqulluta oqarfigiartoqqullusilu: „Kiffaraatsigut. Neriorsuigitsi sorsuffigiumanata.“ Takusinnaavarsi sivisuumik angalanermit atisavut nungullarsimasut iffiaaterpullu parnussimasoq.’

Josuap siulersuisullu allat Gibeonimiut upperaat. Taava neriorsuipput sorsuffigissanagit. Ullulli pingasut kingornagut paasilerpaat Gibeonimiut ungasinngitsunnguami najugaqartut.

’Sooq ungasissumi nunaqarnerarpisi?’ Josuap aperai.

Gibeonimiut akivaat: ’Taamaaliorpugut oqarfigineqaratta Guutersi Jehova neriorsuisoq Kana’anip nunaa tamaat ilissinnut tunniukkumaarlugu. Taamaattumik sioorasorujussuanngorpugut toqoqinagatsigut.’ Israelikkulli neriorsuutertik eqqortippaat Gibeonimiullu toqunnagit. Kiffarilerpaalli.

Jerusalemip kunngia kamappoq Gibeonimiut Israelikkut eqqissivissioqatigimmatigik. Taava kunngit allat sisamat oqarfigai: ’Qaagitsi ikioriartorlungalu Gibeon sorsuffigalugu.’ Kunngillu tallimaasut taamaaliorput. Gibeonimiut silatusaarnerlutik Israelikkut eqqissivissioqatigisimagamikkik, tassami kunngit tallimat taakkua akeqqiummatik? Takussavarput.