Bena Gibeona Bajinga ba Maana
Bena Gibeona Bajinga Ba Maana
MIZHI yavula mu Kenana yatendekele kwinengezha kulwa na bena Isalela. Balangulukile’mba bakonsha kwibashinda. Bino bantu bajinga kipikipi mu muzhi wa Gibeona abo kechi byo byo balangulukile ne. Bayukile’mba Lesa ye wakwashishenga bena Isalela, kabiji kechi bakebele kulwa na Lesa ne. Nanchi wayuka byaubile bena Gibeona nyi?
Bakebele kumwekana nobe bafuma kwalepa bingi. Onkao mambo, banabalume bamo bavwajile bivwalo bya misakila ne kuvwala ku maulu abo makwabilo afwila jimo, o batupaika. Basendele masaka afwila jimo pa bambongolo babo, ne shinkwa wabo yense wauminina jimo ne kuba kabuwa. Kepo bayile kwi Yoshua, ne kumwambila’mba: ‘Twafuma ku kyalo kiji kwalepa bingi, mambo twaumvwa nkuwa ya Yehoba Lesa wenu mukatampe. Twaumvwine byonse byo aubile mu Ijipita. Kabiji bakulumpe betu betwambijile’mba, sendai mpao ya pa lwendo, muye ne kwimwambila’mba: ‘Twi bakalume benu. Tulayai kuba’mba kechi muketutula nzhita ne.’ Mwamona ne bivwalo byetu byatabauka na mambo a kulepa kwa museke ne shinkwa wetu wauba kabuwa ne kuma.’
Yoshua ne bantangi bakwabo baumvwine byaambile bena Gibeona. Kepo balayañene nabo kuba’mba kechi bakebatula nzhita ne. Bino moba asatu alondejilepo baishile kuyuka amba bena Gibeona baikalangatu kipikipi.
Ponkapo Yoshua wibepwizhe’mba: ‘Mambo ka o mwitwambijile’mba mwafuma ku kyalo kiji kwalepa bingi?’
Bena Gibeona bakumbwile’mba: ‘Mambo betubujile amba Yehoba Lesa wenu walayile kwimupa kino kyalo kyonse kya Kenana. Onkao mambo twajinga na moyo mukatampe wa kuba’mba kwendapo mwitwipaya.’ Bino bena Isalela balayile uno mulaye, kabiji kechi bebepaile bena Gibeona ne. Bebalwiletu ke bamingilo babo.
Mfumu wa mu Yelusalema wazhingijile bingi mambo bena Gibeona bapwaine na bena Isalela. Kepo aambijile bamfumu bakwabo bana amba: “Iyai kuno, munkwashe, twibalwishe bena Gibeona.” Ne kya kine bano bamfumu batanu byo byo baubile. Nanchi bena Gibeona bajinga na maana pa kupwana na bena Isalela, ne kulengela bano bamfumu kwiya na kulwa nabo nyi? Tusakumona.
