Esimwititi 48: Vangibiyoni wonondunge
YITATA yoyinzi moKanani makura tayi liwapaikire yi rwise Vaisraeli. Awo kuna kugazara asi nampo kuvhura va funde. Nye vantu womositata sopopepi saNgibiyoni kapi vana kugazara ngoso. Awo kwa pulire asi Karunga yige ana kuvatera Vaisraeli, ano awo kapi vana hara kurwanesa Karunga. Ono diva asi yinke vana rugana Vangibiyoni?
Awo tava tokora va lininkise ngwendi kwa kara koure sili. Vagara vamwe makura tava dwara yikoverero yokutavauka nononkaku dokukurupa. Tava tulike koyindongi yawo nonsako dokukurupa, ntani tava simbi nomboroto dokukurupa dononkukutu. Makura tava zi kwaJosuwa nokutanta asi: ‘Ose kwa tunda kosirongo sokoure unene, morwa twa zuvha kuhamena Karunga gweni gomunene, Jehova. Twa zuvha nayinye eyi ga mu ruganena moEgipite. Vampitisili vetu yipo va tu tantera asi guseni nondya dimwe mu liwapaikire rugendo mu ka tante asi: “Ose vakareli veni. Tu tumbwidireni asi kapi ngomu tu rwisa.” Tomu mono tupu yikoverero yetu omu yina kurupire morugendo rorure ntani nomboroto zetu za kurupa nokukukuta.’
Josuwa novampitisili vakwawo tava pura eyi va tente Vangibiyoni. Makura tava tura po etumbwidiro asi kapi nava va rwisa. Nye konyima zomazuva gatatu tava yi nongonona asi Vangibiyoni nani pepi-pepi va tunga.
Josuwa ta pura asi: ‘Yisinke mwa tu tanterera asi koure mwa tunda?’
Vangibiyoni tava limburura asi: ‘Eyi twa yi ruganena eyi morwa va tu tantera asi Karunga gweni Jehova kwa tumbwidira a gave sirongo nasinye esi saKanani kweni. Ose kwa tjira asi one ngomu tu dipaga.’ Nye Vaisraeli tava sikisa mo etumbwidiro lyawo, makura kapi va dipagere Vangibiyoni. Awo tava va ninki va kare vakareli vawo.
Hompa gwaJerusarema ta handuka unene morwa Vangibiyoni kwa likwete ukwawo noVaisraeli. Age ta tantere ko vahompa hena vane asi: ‘Wizeni mu ya kwafe nge kurwisa Ngibiyoni.’ Ano eyi yiyo va rugene vahompa vatano ava. Vangibiyoni va rugene nye ukotoki mokulikwata ukwawo noVaisraeli, eyi ya ninkisire vahompa ava va ya va rwanese ndi? Natu tara.
Josuwa 9:1-27; 10:1-5.
Mapuro
- Ngapi omu va lisiga vantu wovaNgibiyoni koVakanani womoyitata yopopepi?
- Moomu vana yi fanekesa mefano, yinke vana rugana Vangibiyoni, ntani morwasinke?
- Etumbwidiro musinke vana tura po oJosuwa novampitisili woVaisraeli koVangibiyoni, nye yinke vana ya nongonona konyima zomazuva gatatu?
- Yinke yina horoka apa vahompa womoyitata yapeke va zuvhire asi Vangibiyoni vana likwata ukwawo noVaisraeli?
Mapuro gokugwederera ko
- Resa Josuwa 9:1-27.
Moomu ga pangerere Jehova muhoko gwaIsraeli ‘mokudipaga vantu va kara mosirongo mudima,’ yikara musinke ga likidire apa ga dilire kuzonagura po Vangibiyoni?
Pokukwaterera ketumbwidiro eli ga tulire po kumwe noVangibiyoni, ngapi omu ga tura po Josuwa sihonena sosiwa koVakriste naina?
- Resa Josuwa 10:1-5.
Ngapi omu ali honene naina emukurumbunga Vangibiyoni, ntani kuyakara vahomokerwa wosinke?
