Icisimicisyo 48: AbaGibyoni Abamano
IMISI iingi mu Kanani pano yalibamba ukulwa na Isilaeli. Balukulanguluka ati bangacimfya. Pano abantu aba mu musi wapepi abaGibyoni tabalukulanguluke’fyo. Balicetekele ukweba’ti baLesa balukofwa abaIsilaeli, kabili tabalukufwaya ukulwisya baLesa. Popele kani waisiba ifi abaGibyoni bacita?
Basuminisyanya ukweba’ti bacite ifyakuboneka ati balekala kumbi ukutali makosa. Popele bambi abalalume bafwala ifyakufwala ifikwamakile ne nsapato isibambicilwe. Balonga pa mbongolo syabo amasaaka aakwamakile, ne kupinta sinkwa wakale uumine. Eli baya kuli Josyua ne kulabila ati: ‘Twafuma ku calo icakutali, pakuti twalyumfwile pali baLesa wenu abamakosa, baYehoba. Twalyumfwile fyonse’fyo ifintu bamicitile mu Ijipiti. Popele intanjisi syesu syalitubulile ukupekanya ifyakulya fya pa lwendo ne kwisa mukulabila kuli mwebo ati: “Tuli bapyunjisi benu. Layeni ati tamukalwapo nafwebo.” Koti mwabona ati ifyakufwala fyesu filikwamakile pakuti pa lwendo ulutali na sinkwa wesu akokola kabili auma.’
Josyua ne ntangisi simbi babacetekela abaGibyoni. Popele balaya ati tesi bakalwe nabo. Lomba ili papitile insiku sitatu baisiba ati abaGibyoni mucinenene balekala apepi.
Josyua abepusya ati: ‘Mba nindo mwatutumpaikile ati mwalifumine ku calo ca kutali?’
AbaGibyoni baasuka ati: ‘Twalicitile’ci nipakuti balitubulile ati baLesa wenu baYehoba balilaile ukupela conse icalo ca Kanani kuli mwebo. Popele twali ne mwenso ati mukatwipaya.’ Pano abaIsilaeli balama ukulaya kwabo, kabili tababepeye abaGibyoni. Mu mupunda wa ceco babacita abapyungisi babo.
Imfumu ya ku Jelusalemi yakalipa pakuti abaGibyoni bacita ubutende na Isilaeli. Popele yalabila kuli simbi imfumu sine ati: ‘Iseni mungofwe ukupama Gibyoni. Kabili fyefyo efi isi imfumu sisanu syacita. Kani abaGibyoni baali ne mano pa kucito’butende na Isilaeli, icalenga pano ati imfumu isi sise mu kulwa nabo? Twakubona.
Josyua 9:1-27; 10:1-5.
Ifyakwipusya
- Kani abaGibyoni balipusene syani ne baKanani aba mu misi yapepi?
- Koti nifyefyo icikope cilukulanga, kani abaGibyoni bacite’ndo, kabili nindo bacitile’fyo?
- Kani Josyua ne ntangisi sya Isilaeli nifindo balaya abaGibyoni, pano nifindo baisiba panuma ya nsiku sitatu?
- Mba nifindo fyacitika ili imfumu sya mu misi imbi syaumfwa ati abaGibyoni bacita ubutende na Isilaeli?
Ifyakwipusya na fimbi
- Pendeni Josyua 9:1-27.
Pakuti baYehoba balifundile umukoka wa Isilaeli ati ‘wonale abantu bonse aba mu calo,’ niisa imibelo baYehoba balangisye pa kubulo’konala abaGibyoni? (Jos. 9:22, 24; Mat. 9:13; Cit. 10:34, 35; 2 Pet. 3:9)
Pakulama ukulayana acitile ne baGibyoni, kani Josyua alimakanikile syani icakubwenako iciweme ku baKlistu muli bulelo? (Jos. 9:18, 19; Mat. 5:37; Efes. 4:25)
- Pendeni Josyua 10:1-5.
Kani ibumba ilikulu muli bulelo lilatuntulula syani abaGibyoni, namulifyefyo nifindo fibacitikila? (Jos. 10:4; Saka. 8:23; Mat. 25:35-40; Fisu. 12:17)
