NIM qe tnam te Canaán nchi bʼinchen kyten tuʼn kyqʼojen kyiʼj aj Israel. In kubʼ kyximin qa jaku chi kubʼ kyuʼn. Aqetzun kye xjal te Gabaón nya ik kyximjo. Nel kynikʼ qa a Dios in nonin kyiʼj aj Israel, ex nya kyaj tuʼn kyqʼojin tukʼil Dios. ¿O tbʼiye tiʼ bʼent kyuʼn aj Gabaón?

Kubʼ kyximen tzeʼn tuʼn miʼ tel nikʼ kyiʼj ex qa najchaq, mo laqʼche ateʼtoq. Tuʼntzunjo, ok kyqʼoʼn ttxʼaqan kyxbʼalen ex ttxʼaqe kyxajabʼ (kyxabʼ). Xe kyiʼn tzqij pan toj ttxʼaqin kostal ex ok kyqʼoʼn tiʼj kychej. I eʼxtzun tukʼe Josué ex xi kyqʼamaʼn te: ‹Tzajni qoʼye tuj jun tnam najchaq. Tuʼnju o qbʼiye tbʼanel tqanil tiʼj kyDiose, aju Jehová. O qbʼiye tkyaqilju o tbʼincha kyeye tuj Egipto. Tuʼntzejo, tzaj kymaʼn qnejenele qeye tuʼn tkubʼ qbʼinchen qtene tukʼe qwaye ex tuʼn qtzaje qʼamalte kyeye: Qaje tuʼn qoke te kymajene, ex qaje tuʼn tkyaj bʼant tiʼj jun kyyole qukʼile tuʼn miʼn kyqʼojene qiʼje. Ax ikx jaku tzʼel kynikʼe tiʼj qxbʼalune ma chi ok te ttxʼaqe tuʼnju nim xqo bʼete ax ikx qeju pan ma che kubʼ tzqij›.

Ok qʼuqeʼ tkʼuʼj Josué ex qejo txqantl nejenel tiʼj kyyol aj Gabaón. Tuʼntzunjo, xi kytziyen kye qa melatoq che qʼojin kyiʼj. Tojtzen oxe qʼij kybʼi aj Israel qa nqakutaq nchi anqʼin xjal lu.

‹¿Tiquʼn tzaj kymaʼne qeye qa najchaq oteq che tzajiye?› Chi Josué.

Tzaj kytzaqʼweʼn aj Gabaón kyjalu: ‹Tuʼnjo tzaj qʼamaʼn qeye qa kxel tqʼoʼn Jehová tkyaqil txʼotxʼ te Canaán kyeye. Tuʼntzunju, o jaw xobʼxixe qa qo kbʼel kybʼiyoʼntaqe›. Atzun kye aj Israel tzaj kynaʼn kyyol aju otaq kyaj bʼent tiʼj kyukʼil, ex mitiʼ e kubʼ kybʼiyoʼn aj Gabaón. Naq e ok kyqʼoʼn te kymajen.

Tzaj tqʼoj kawil te Jerusalén tuʼnjo oteq kyaj bʼant tiʼj kyyol aj Gabaón kyukʼe aj Israel. Tuʼntzun jlu, xi tmaʼn kye kyajetl aj kawel kyjalu: ‹Kytzaje onil weye tuʼn qqʼojin kyiʼj aj Gabaón›. Ik bʼent kyuʼnjo jweʼ kawil lu. ¿Bʼaʼnpetzulo bʼant kyuʼn aj Gabaón tuʼnju kyaj bʼant tiʼj kyyol kyukʼe aj Israel, quʼn luqe aj kawil chi ul qʼojel kyiʼj? Ok kʼelel qnikʼ tiʼj jlu.