STORJA 48
Il-Gibegħonin Għaqlin
ĦAFNA mill-bliet f’Kangħan issa jlestu biex jiġġieldu kontra Iżrael. Huma jaħsbu li jistgħu jirbħu. Imma n-nies fil-belt taʼ Gibegħon li hi fil-viċin ma jaħsbux hekk. Dawn jemmnu li Alla qed jgħin lill-Iżraelin, u ma jridux jiġġieldu kontra Alla. Allura taf x’jagħmlu l-Gibegħonin?
Jiddeċiedu li jagħmlu tabirruħhom li jgħixu xi mkien ’il bogħod ħafna. Għalhekk, ftit mill-irġiel jilbsu ħwejjeġ imqattgħin u sandlijiet qodma. Jgħabbu l-ħmir tagħhom bi xkejjer mherrijin, u jieħdu ftit ħobż qadim u niexef. Imbagħad imorru għand Ġożwè u jgħidu: ‘Aħna ġejna minn art ’il bogħod ħafna għax smajna dwar il-kbir Alla tagħkom, Ġeħova. Smajna dwar l-affarijiet kollha li għamel għalikom fl-Eġittu. Għalhekk il-mexxejja tagħna qalulna biex illestu xi ikel għall-vjaġġ u niġu u ngħidulkom: “Aħna l-qaddejja tagħkom. Wegħduna li ma tiġġildux kontrina.” Tistgħu taraw li ħwejjiġna therrew mill-vjaġġ twil u li ħobżna nixef u qdiem.’
Ġożwè u l-mexxejja l-oħrajn jemmnu lill-Gibegħonin. Għalhekk iwiegħdu li ma jiġġildux kontrihom. Imma tlett ijiem wara jsiru jafu li l-Gibegħonin fil-fatt jgħixu fil-viċin.
Ġożwè jistaqsihom: ‘Għalfejn għedtulna li ġejtu minn art ’il bogħod?’
Il-Gibegħonin iwieġbu: ‘Għamilna hekk għax qalulna li Alla tagħkom Ġeħova kien wiegħed li jagħtikom din l-art kollha taʼ Kangħan. Għalhekk bżajna li kontu se toqtluna.’ Imma l-Iżraelin iżommu l-wegħda tagħhom, u ma joqtlux lill-Gibegħonin. Minflok, jagħmluhom il-qaddejja tagħhom.
Is-sultan taʼ Ġerusalemm hu rrabjat għax il-Gibegħonin għamlu l-paċi m’Iżrael. Għalhekk jgħid lil erbaʼ slaten oħrajn: ‘Ejjew u għinuni niġġieled kontra Gibegħon.’ U hekk jagħmlu dawn il-ħames slaten. Kienu għaqlin il-Gibegħonin li għamlu l-paċi m’Iżrael, peress li dan wassal biex dawn is-slaten jiġu jiġġieldu kontrihom? Se naraw.