HISTORIA 48
Na̱ ñuu Gabaón va̱ʼa nda̱kanixi̱nína
KU̱A̱ʼÁNÍ na̱ ñuu na̱ íyo yatin xíʼin ñuu Canaán nda̱kaya̱na ña̱ kanitáʼanna xíʼin na̱ ñuu Israel, chi saá kúú ña̱ kuchiñuna xíʼinna túvi miína. Soo na̱ ñuu Gabaón kǒo kándíxana ña̱yóʼo. Na̱yóʼo xíni̱vana chi Jehová chindeéra na̱ ñuu Israel, ta kǒo kúni̱na kanitáʼanna xíʼin Jehová. Xa̱ʼa ña̱yóʼo, ¿á xíni̱ún ndáaña i̱xaa na̱ ñuu Gabaón?
Ni̱ka̱ʼa̱n xíʼin táʼanna ña̱ inkáchi ka̱ʼa̱nna ña̱ káni̱ní ñuu ke̱ena. Xa̱ʼa ña̱yóʼo savana nda̱kundixina ti̱ko̱to̱ yatá ta ta̱ánna ndu̱xa̱n yatá xa̱ʼana. Ta ndíso tí burro sa̱na̱na costa yatá xíʼin si̱táva̱ʼa yi̱chí. Tasaá ku̱a̱ʼa̱nna nu̱ú ta̱ Josué ta ni̱ka̱ʼa̱nna xíʼinra: ʼKáni̱ní ndíka̱a̱ ñuu nu̱ú ke̱endi̱, ta va̱xindi̱ chi xi̱niso̱ʼondi̱ xa̱ʼa Jehová xíʼin ndiʼi ña̱ ke̱ʼéra xíʼinndó ñuu Egipto. Xa̱ʼa ña̱yóʼo ni̱ka̱ʼa̱n na̱ chíñu ñuundi̱ xíʼindi̱ ña̱ ná kixi ña̱ʼa xíʼinndi̱ kuxundi̱ ña̱ va̱ʼa kixindi̱ nu̱úndó, ta va̱xindi̱ káʼa̱nndi̱ xíʼinndó: “Ña̱ kuundi̱ na̱ kachíñu nu̱úndó, ta vitin ka̱ʼa̱nndó ña̱ kǒo kanitáʼanndó xíʼinndi̱”. Ta kotondó ti̱ko̱to̱ndi̱ xa̱ku̱yatávaña chi káni̱ní ke̱endi̱, ta si̱táva̱ʼa ña̱ va̱xi xíʼinndi̱ xa̱ni̱yi̱chi̱ ndiʼivañaʼ.
Ta̱ Josué xíʼin inka na̱ chíñu ñuu Israel ka̱ndíxavana ña̱ ni̱ka̱ʼa̱n na̱ ñuu Gabaón xíʼinna. Xa̱ʼa ña̱yóʼo ni̱ka̱ʼa̱nna xíʼinna, kǒo kanitáʼanndi̱ xíʼinndó. Soo tá ni̱ya̱ʼa u̱ni̱ ki̱vi̱ saá na̱kunda̱a̱-inina yatinva ndíka̱a̱ ñuu na̱yóʼo.
Ta̱ Josué ni̱ka̱ʼa̱nra xíʼinna: ʼ¿Ndachun sa̱ndáʼvindó ndi̱ʼi̱ ña̱ káni̱ní ke̱endó?ʼ
Ta na̱yóʼo nda̱kuiinna: ʼChi na̱kunda̱a̱-inindi̱ ña̱ ni̱ka̱ʼa̱n Jehová taxira ndiʼi ñuʼú ña̱ Canaán ndaʼa̱ndó. Xa̱ʼa ña̱yóʼo ni̱yi̱ʼvíndi̱ ña̱ sandiʼi-xa̱ʼandó ndi̱ʼi̱ʼ. Soo na̱ ñuu Israel sa̱xínuvana tu̱ʼun ña̱ ni̱ka̱ʼa̱nna xíʼinna, kǒo níxaʼnínana. Ta vitin ndu̱una na̱ káchíñu nu̱úvana.
Ta̱ rey ña̱ ñuu Jerusalén ni̱sa̱a̱ra xíʼin na̱ ñuu Gabaón xa̱ʼa ña̱ ni̱ki̱ʼvi táʼanna xíʼin na̱ ñuu Israel. Ta ni̱ka̱ʼa̱nra xíʼin inka ku̱mí na̱ rey: ʼKixindó ta chindeéndó yi̱ʼi̱ ña̱ kanitáʼanyó xíʼin na̱ ñuu Gabaónʼ. Ta̱ vitin nda̱taka u̱ʼu̱n saá na̱ rey yóʼo. ¿Á va̱ʼa ña̱ i̱xaa na̱ ñuu Gabaón ña̱ ni̱ki̱ʼvi táʼanna xíʼin na̱ ñuu Israel? Ta vitin u̱ʼu̱n kúú rey na̱ kúni̱ kanitáʼan xíʼin na̱yóʼo. Ná kotoyó ndáaña ku̱u.
