VIFUTI viose via mu Kanana vi li na ku liviukisila mu ku lua ndzita na vaIsaleli. Va na singanieka nguavo va hasa ku vula Isaleli. Vunoni vantu va ku Ngiveone ka va singaniekele ngoco. Muomu va na tantekeya nguavo Njambi a li na ku kuasa vaIsaleli, ngeci ka va tondo ku lua na Njambi. Ua tantekeya vati va na lingi vakua Ngiveone?

Va na likuisa ngue kuimbo liavo ku laako cikuma na Isaleli. Ngeci vamo vamala va na zala vikovelo via ku tavuoka na vinkaku via ku huila. Kaha va na londeka vinjeke via ku sukuua ha vimulu na ku ambata mbolo ya ku uminina. Va na ka lisolola kuli Yehosua nguavo: ‘Tu na fumu ku cifuti ca ku laako, muomu tu nevu via li na ku linga Njambi yenu Yehova. Tu nevu viose via mi lingilile ku Ingito. Ngeci vantuamena vetu va na tu tumine ku viukisa via-ku-lia via vungendzi, linga tua ku mi lambelele nguetu: “Tu vangamba venu. Tu kulahesenu nguenu ka mu ka lua netu”. Tenu vuzalo vuetu vu na kulu na mbolo yetu inomu omo lia ku laha ca vungendzi’.

 Kaha Yehosua na vantuamena vakuavo va na tava ku mezi avo. Ngeci va na likuminia navo nguavo ka va ka va tsihi. Vunoni mu nima ya matangua atatu va tantekeyele nguavo nkuma vakua Ngiveone va tunga mu hiehi.

Yehosua ua va hula ngueni: ‘Vika mu na tu kuisila nguenu mu vakua cifuti ca ku laako?’

Va mu kumbulula nguavo: ‘Muomu tu nevu ngecize Yehova Njambi yenu na kulahesa ku mi hana cifuti ca Kanana. Ngeci tu nevu vuoma nguetu mua ku tu tsiha’. Kaha vaIsaleli va na likuminia navo nguavo vutuhu va na va kuisile, kava va tsihi. Vunoni va na va puisa vangamba vavo.

Muangana ua Yelusalema na niengua cikuma na vakua Ngiveone, muomu va na litavasiana na vaIsaleli. Ngeci na lania vamiangana vakuavo va uana ngueni: ‘Tuayenu mua ku nji kuase ku luisa vakua Ngiveone’. Ngeci ava vamiangana vatanu va na ka lua na vakua Ngiveone. Vuno vakua Ngiveone va puile vakua mana cili omo va litavasianene na vaIsaleli linga kati va va luise, nga kasi kuezile naua vamiangana vatanu mukua ku va luisa ni? Amba tu ka vi tantekeya.