OYINDJI yomiilando yomuKanaan otayi ilongekidha ngashingeyi oku ka kondjitha Israel. Yo otayi dhiladhila kutya otayi vulu okusindana. Ihe aantu yoposhilando shopopepi Gibeon yo itaa dhiladhila ngawo. Yo oyi itaala kutya Kalunga ota kwatha Aaisrael, noinaya hala ya kondjithe Kalunga. Owa tseya kutya Aagibeon otaa ningi po shike ngashingeyi?

Yo otaa tokola oku shi monikitha sha fa ongo yo taa zi kokule. Ano yamwe yomaalumentu otaa zala oonguwo dha tuuka noongaku dha kulupa. Otaa londeke oompunda dha kulupa kuusino wawo, notaa kutha iikwiila iikulu ya kukuta ya ye pamwe nayo. Opo nduno otaa yi kuJosua notaa ti: ‘Tse otatu zi koshilongo shokokule, oshoka tse otu uvu kombinga yaKalunga keni omunene, Jehova. Tse otu uvu shoka ye e mu ningile muEgipiti. Aawiliki yetu oye tu lombwele tu longele iikulya yolweendo notu ye kune notu tye: “Tse aapiya yeni. Tu uvanekeleni kutya ne itamu ke tu kondjitha.” Ne otamu vulu okumona kutya oonguwo dhetu odha nyanyauka molwuule wondjila nonokutya iikwiila yetu oya kulupa noya kukuta.’

Josua naawiliki yalwe oyi itaala Aagibeon. Ano otayu uvaneke okwaahe ya kondjitha. Ihe konima yomasiku gatatu otaye shi mono mo kutya paushili wo wene Aagibeon oya kala popepi mpoka.

‘Omolwashike mwe tu lombwele kutya otamu zi koshilongo shokokule?’ Josua te ya pula.

Aagibeon otaa yamukula: ‘Tse otwe shi ningi oshoka tse otu uvu kutya Kalunga keni Jehova oku uvaneke okugandja oshilongo shika ashihe shaKanaan kune. Ano tse otwa li twa tila kutya otamu ke tu dhipaga.’ Ihe Aaisrael otaa gwanitha euvaneko lyawo noitaa dhipaga Aagibeon. Pehala lyaashono yo otaye ya ningi aapiya yawo.

Omukwaniilwa gwaJerusalem okwa geya molwashoka Aagibeon oya panga ombili naIsrael. Ano ye ota ti kaakwaniilwa yalwe yane: ‘Ileni nomu kondje pamwe nangame tu kondjitheni Aagibeon.’ Nosho shoka aakwaniilwa mbano yatano taa ningi. Aagibeon oya li mbela aanandunge okupanga ombili naIsrael, ndjoka ngashingeyi tayi eta sha shoka tashi ningitha aakwaniilwa mbaka ye ye oku ya kondjitha? Otatu ke shi mona nale.