Yachayniyuq gabaonitas
48 yachachiy
Yachayniyuq gabaonitas
CANAANMANTA achkha llaqtakuna israelitaswan maqanakunankupaq wakichikuchkanku. Atipasqayku ninkuchá. Chaywanpis Gabaón llaqtaqa mana chayta ninchu. Paykunaqa Jehová israelitasta yanapasqanta creenku. Manataq Dioswan maqanakuyta munankuchu. Chayrayku, ¿gabaonitas ruwasqankuta yachankichu?
Karu llaqtamanta kasqankuta creechiyta munasqankurayku, astawan thanta pʼachankuta, thanta jukʼutankuta churaykukunku. Burrosninkumantaq thanta costalasta chaqnaykunku, may chuqru tʼantata ima apanku. Josueta taripaspataq ninku: ‘Juk karu llaqtamanta jamuchkayku, Jehová jatun Diosniykichikmanta uyarisqaykurayku. Egiptopi qamkunarayku ruwasqanta uyariyku. Chayrayku ñuqaykumanta kuraqkunaqa mikhunata wakichikuspa kayman jamunaykuta niwayku, kayta nisunaykupaq: “Ñuqayku kamachisniykichik kayku. Ama ñuqaykuwan maqanakunaykichikpaq tratota ruwaychik”. Qamkunataq pʼachasniyku thantaña kasqanta, chantapis tʼantayku chuqruña kasqanta rikuchkankichik’.
Josué, wak kuraqkuna ima gabaonitasta creerqanku. Chayrayku, gabaonitaswan mana maqanakunankupaq tratota ruwarqanku. Kimsa pʼunchayninmantaq gabaonitas chayniqllapi tiyakusqankuta yacharpanku.
‘¿Imaraykutaq karu llaqtamanta jamusqaykichikta niwaykuri?’, nispa Josué gabaonitasta tapurqa.
Gabaonitastaq kutichinku: ‘Jehová Diosniykichik tukuy kay Canaán jallpʼata qusunaykichikta uyariyku. Chayrayku wañuchinawaykuta manchachikuspa kayta ruwayku’, nispa. Israelitasqa parlasqankuta juntʼanku, manataq gabaonitasta wañuchinkuchu. Manaqa kamachisninman tukuchinku.
Canaamanta reyqa gabaonitas Israelwan tratota ruwasqankurayku phiñakun. Chayrayku tawa reykunata waqyakuspa nirqa: ‘Jamuychik, Gabaón contranta maqanakuypi yanapawaychik’, nispa. Chaytataq ruwanku allinchu gabaonitas Israelwan tratota ruwasqanku. Qhawarina.
