MAATA te au oire i Kanaana i teianei e akapapa ra i te tamaki atu i to Iseraela. Manako ratou e ka autu ratou. Inara kare te tangata o te oire o Gibeona i te pae ua mai e manako ana mei te reira rai. Irinaki ratou e te tauturu nei te Atua i to Iseraela, e kare ratou e inangaro i te tamaki atu i te Atua. Kua kite koe e eaa ta to Gibeona i rave?

Kua maani ratou kia akaraanga e no tetai ngai mamao roa mai ratou. No reira tetai au tangata i aao ei te au kakau veruveru e te au tamaka piro. Kua tuku ratou i ta ratou au pute piro ki runga i to ratou au atini, e kua apai atu i tetai au varaoa taito kua maro. I reira kua aere atu ratou ki ko ia Iosua e kua karanga e: ‘Te aere mai nei matou no tetai enua mamao roa, no te mea kua akarongo matou no runga i to kotou Atua maata, ko Iehova. Kua akarongo matou i te au apinga pouroa tana i rave no kotou i Aiphiti. No reira kua akakite mai to matou au arataki kia matou kia akapapa i te kai no teia tere, e kia aere mai kia akakite atu kia koe e: “Ei tavini matou noou. Taputou mai ana e kare koe e tamaki mai ia matou.” Te kite mai nei koe e kua piro to matou au kakau no te mamao i to matou tere e kua maro e te taito ta matou varaoa.’

Kua irinaki a Iosua e tetai au arataki i te au tangata Gibeona. I reira kua taputou to Iseraela kia kore e tamaki atu ia ratou. Inara e toru ra i muri mai kua kite mai ratou e vaitata ua mai te ngai e noo ana to Gibeona.

‘Eaa kotou i karanga mai ei e no tetai enua mamao mai kotou?’ i ui ei a Iosua kia ratou.

Pau mai te iti tangata Gibeona e: ‘Kua rave matou i teia no te mea kua akakiteia mai kia matou e kua taputou to kotou Atua ko Iehova i te oronga i te au enua pouroa o Kanaana no kotou. No reira kua mataku matou e ka tamate kotou ia matou.’ Inara kua akono to Iseraela i ta ratou taputou, e kare ratou i tamate ana i te au tangata Gibeona. Tera ra kua akariroia ratou ei au tavini no to Iseraela.

Kua riri te ariki o Ierusalema no tei akaau atu te au tangata Gibeona ki to Iseraela. No reira aia i karanga ai ki te au ariki e a e: ‘Aere mai e tauturu iaku i te tamaki i to Gibeona.’ E ko teia ta te au ariki e rima i rave. E tu karape ainei to te ngati Gibeona i te akaau atu ki to Iseraela, tei riro ei akariri i teia au ariki kia tamaki mai ia ratou? Ka akara tatou.