KANAˈˈAANI gobbara heedhanno katammara noo manni gudisire Isiraeele qasate kaino. Insa duuchchunku Isiraeelete manna qeeltannoha lawinonsa. Qooxeessaho heeˈrannohu Gebaooni katami manni kayinni hatto yee dihedino. Kuni manni Maganu Isiraeele kaaˈlanni noota ammanino; konni daafira Maganu ledo qasama dihasiˈrino. Konnira Gebaooni manni ma assiro afitto?

Insa xeerto gobbanni dagginore labbe leellate heddu. Konni daafira, insa giddonni gamu mannooti tattaˈino uddano uddidhu; tattaˈˈino caammano wodhitu. Qolteno tattaˈino dooniyyuwa harrete hogobbu; hattono keeshshinoha moolino tima sinqisidhu. Hakkiinnino Iyyaasuwa marte, ‘Bayiru Maganiˈne Yihoware macciishshine xeerto gobbanni dangoommo. Maganiˈne Gibitsete gobbara assinoˈnere baala macciishshinoommo. Konni daafira massaggannonke mannooti, doogora shiima sinqe adhine dange kiˈne togo yineemmo gede sokkinonke: “Ninke soqqamaanoˈneeti. Kiˈne ledo diqasammeemmo yitine qaale eˈenke.” Haˈne dangoommo doogo seeda ikkitino daafira, kuneeti uddanonke tattaˈino garanna timinke keeshshe moolino gara laˈe’ yitu.

Iyyaasunna wolootu massagaano Gebaooni mannooti yitinore ammantu. Konni daafira diqanseemmoˈne yite qaale eˈu. Ikkollana sasu barri gedensaanni Gebaooni manni qooxeessinsara heeˈrannoha ikkinota affu.

Iyyaasuno, ‘Xeerto gobbanni dangoommo mayira yitini?’ yee xaˈminsa.

Gebaooni mannino, ‘Hatto yinoommohu, Maganiˈne Yihowa tenne Kanaˈˈaani gobba woˈma aaˈnera qaale einota macciishshineeti. Konni daafira shitinanninke yine waajjinummo’ yitu. Ikkollana Isiraeele eˈino qaale agadhitu; Gebaooni manna shaa agurte, soqqamaanonsa assidhu.

Yerusaalamete nugusi, Gebaooni manni Isiraeelete ledo jaalooma kalaqirino daafira hanqi. Konni daafira, wole shoole nugussa, ‘Daggine Gebaooni manna qasa kaaˈleˈˈe’ yii. Hakkiinnino ontunku nugusi Gebaooni manna qassu. Tini nugussa qassannonsa gede assitino Isiraeele ledo, Gebaooni manni jaalooˈmansa hayyimmate? Tenne hajore albaange ronseemmo.