ŴANDU ŵajinji m’misinda ja ku Kanani akosecele kumenyana ni Ayisalayeli. Jemanjajo akuganisya kuti mpaka apunde. Nambo Agibeoni ŵakutama mwakuŵandikana ni msinda wa Kanani ngakuganisya yeleyo. Jemanjajo akukulupilila kuti Mlungu akwakamucisya Ayisalayeli, m’yoyo ngakusaka kulimbana ni Mlungu. Ana akumanyilila yakutenda Agibeoni?

Jemanjaji akuganisya yakulilosya mpela kuti ali ŵandu ŵa ku cilambo cakutalicila mnope. Ŵane mwa ŵanduwo akuwala yakuwala yemale ni sapato syepapucepapuce. Akwatwika abulu ŵawo misaku jepapuce, soni akujigala mikate jejumu jakalakala. Ni akwawula kwa Yoswa nikuŵeceta najo acitiji: ‘M’weji tuyice kutyocela ku cilambo cakutalicila mnope, ligongo tupikene yakwamba Mlungu jwawo jwamkulungwa, Yehofa. Tupikene yosope yaŵatendele jemanja ku Eguputo. M’yoyo acimlongola ŵetu ŵatusalile kuti tupate yakulya yapaulendo wakwika kwa jemanja kukwasalila kuti: “M’weji tuli ŵamasengo ŵawo. Atusimicisye kuti ngasatuputa ngondo m’weji.” Alole yakuwala yetu yipapwice ligongo lya ulewu wa ulendo, soni mikate jetu jili jakalakala, soni jijumwile.’

Yoswa ni acimlongola ŵane akwakulupilila Agibeoniwo. Sambano akulangana kuti ngasaputana nawo. Nambo pali pagambile kumala masiku gatatu jemanjaji akumanyilila kuti Agibeoni ŵala akusatama pakuŵandika.

Sambano Yoswa akwawusya kuti: ‘Ana ligongo cici mwatulambwisye kuti jemanja mtyocele kucilambo cakutalicila mnope?’

Agibeoniwo ŵajanjile kuti: ‘Twasalile yeleyo ligongo twapikene kuti Mlungu jwawo Yehofa ŵatesile cilangano cakwapa jemanja cilambo cosope ca Kanani. Sambano m’weji twajogopaga kuti jemanja catuwulaje.’ Ayisalayeli ŵatesile yaŵalangene nawo Agibeoni yakuti ngasiŵawulaga. Nambo mmalo mwakwe ŵatesile kuŵa ŵamasengo ŵawo.

Mwenye jwa ku Yelusalemu akutumbila ligongo lyakuti Agibeoni akamulene ya mtunjelele ni Ayisalayeli. Nisambano jwalakwejo akwasalila acayimwene mcece kuti: ‘Kwende angamucisye tukaputane ni Agibeoni.’ Yeleyi ni yakutenda acayimwene msanowo. Ana Agibeoni ŵalosisye lunda pakamulana ya mtunjelele ni Ayisalayeli, yayitendekasisye kuti acayimweneŵa ayice kukwaputa ngondo? Cituyiwone m’bujomu.