HYƐ Yoshua. E ngɛ dee ke: ‘Pu, da si!’ Kɛkɛ nɛ pu ɔ da si. Pu ɔ da si ngɛ hiɔwe ligbi ɔ tsuo. Yehowa ji nɔ nɛ ha e ba mi jã nɛ! Se ha nɛ waa hyɛ yi mi tomi heje nɛ Yoshua ngɛ hlae kaa pu ɔ nɛ hi tsoe kpamisa a.

Benɛ Kanaan zugba a nɔ matsɛmɛ enuɔ ɔmɛ je ta kɛ wo Gibeonbi ɔmɛ ɔ, Gibeonbi ɔmɛ tsɔ nɔ kɛ fo kɛ ya tsɛ Yoshua konɛ e ba ye bua mɛ. Tsɔlɔ ɔ ya de Yoshua ke: ‘Ba esɔesɔ nɛ o ba kpɔ wɔ! Matsɛmɛ ɔmɛ tsuo nɛ ngɛ yoku ɔmɛ a nɔ ɔ ba nɛ́ a kɛ wɔ ba hwu ta.’

Amlɔ nɛ Yoshua kɛ e tabuli ɔmɛ tsuo pue nɔ kɛ ho. A nyɛɛ nyɔnyɔɔnyɔ. Nɛ benɛ a ya su Gibeon ɔ, matsɛmɛ enuɔ ɔmɛ a ta hwuli ɔmɛ a tsui po nɛ a bɔni fo tumi. Kɛkɛ nɛ Yehowa ha aisi tɛ nguahi nɛ kɛ je hiɔwe, nɛ e gbe ta hwuli ɔmɛ babauu po pe nihi nɛ Yoshua webi ɔmɛ gbe ɔ.

Yoshua na kaa e be kɛe nɛ pu ɔ maa nɔ si. Nɛ diblii maa wo, kɛkɛ ɔ, matsɛmɛ enuɔ ɔmɛ a ta hwuli ɔmɛ maa tu fo. Enɛ ɔ heje nɛ Yoshua sɔle ha Yehowa nɛ e de ke: ‘Pu, da si!’ ɔ nɛ. Nɛ akɛnɛ pu ɔ da si be kɛkɛɛ heje ɔ, Israelbi ɔmɛ nyɛ nɛ a ye kunimi ngɛ ta a mi.

Matsɛmɛ yayamihi fuu ngɛ Kanaan zugba a nɔ nɛ́ sume Mawu webi ɔmɛ a sane. Yoshua kɛ e ta hwuli ɔmɛ ngɔ jeha ekpa kɛ ye matsɛmɛ 31 nɔ kunimi ngɛ zugba a nɔ. Enɛ ɔ se ɔ, Yoshua ha nɛ a gba Kanaan zugba a ngɔ ha wɛtsohi nɛ ná we zugba a eko lolo ɔ.

Jehahi babauu ba be, nɛ nyagbe ɔ Yoshua gbo benɛ e ye jeha 110. Be abɔ tsuo nɛ Yoshua kɛ e huɛmɛ ɔmɛ hi si ɔ, mabi ɔmɛ bu Yehowa tue. Se benɛ nimli kpakpa nɛ ɔmɛ tsuo gbo ta a, mabi ɔmɛ kpale bɔni ní yayamihi peemi ekohu nɛ enɛ ɔ ngɔ haomi kɛ ba a nɔ. Lɔɔ ha Mawu dɛ mi yemi kɛ buami he ba hia mɛ nitsɛnitsɛ.