LOLESHA Yoshua uyu ali apa. Alelanda ati: ‘We kasuba, iminina shilili!’ Na kasuba kaliminine. Kali fye ifyo fine, takawile. Yehova e wakeminike! Lelo natumone ico Yoshua alefwaila akasuba ukutwalilila ukusanika.

Ilyo shilya imfumu 5 isha mu Kanaani ishibi shatendeke ukulwisha abena Gibeone, abena Gibeone batumine umwaume umo ukuyaita Yoshua ukuti abafwe. Atile: ‘Iseni, mutupusushe! Imfumu sha mu fyalo fya mpili shonse nashiisa mu kulwisha abantu benu.’

Apo pene fye Yoshua na baume bakwe bonse aba nkondo baliile. Baendele ubushiku bonse. Ilyo bafikile ku Gibeone, abashilika ba mfumu shilya 5 balitiinine no kutendeka ukubutuka. Lyena Yehova alengele imfula ya mabwe iikalamba ukuloka, kabili abashilika abafwile kuli iyi mfula bali abengi ukucila abo abaume ba nkondo aba kwa Yoshua baipeye.

Yoshua amwene akasuba kaya kaleingila. Kabili alishibe ukuti kwalafiita, na bashilika abengi aba mfumu shilya 5 ishibi balabutuka. E ico Yoshua alipepele kuli Yehova, na pa numa atile: ‘We kasuba iminina shilili!’ Kabili ilyo akasuba katwalilile ukusanika, abena Israele batwalilile ukulwa mpaka fye bacimfya.

Mwalishele imfumu ishingi mu Kanaani ishapatile abantu ba kwa Lesa. Palipitile imyaka nalimo 6 pa kuti Yoshua na bashilika bakwe bacimfye imfumu 31 muli cilya calo. Ilyo acimfishe imfumu shonse, Yoshua alyakenye icalo ca Kanaani ku mikowa iishakwete impanga.

Palipitile imyaka iingi, Yoshua asuka afwa ninshi ali ne myaka 110. Ilyo Yoshua na banankwe tabalafwa, abantu baleumfwila Yehova. Lelo ilyo aba abantu abasuma bafwile, abantu batendeke ukucita ifyabipa no kuiletela amafya. Ilyo bakwete amafya, e lyo batendeke ukufwaya sana ukuti Lesa alebafwa.