RAICI Josua mada. E kaya tiko: ‘Matanisiga, tu vakadua!’ Sa qai tu vakadua na matanisiga. E tu vakadua me rauta ni dua taucoko na siga. E vakavuna o Jiova na ka oqori. Ia da raica mada se cava e vinakata kina o Josua me cila tiko ga na siga.

Era sa mai valuti Kipioni na lima na tui ca ni vanua o Kenani. Ra qai lai kere veivuke vei Josua na kai Kipioni: ‘Lako mai vakatotolo vei keimami! Mai vakabulai keimami! Era sa mai valuti keimami na tui kece ni veidelana.’

Sega tale ni qai wawa o Josua kei ira na nona sotia. Era taubale yani ena loma ni bogi taucoko. Nira yaco yani i Kipioni, era sa dro e so na sotia ni lima na tui nira sa rere. Sa qai vakaliwava mai lomalagi o Jiova e dua na cagi kaukaua e tau vata mai na ucavatu. E levu era a mate ena ucavatu oqo, era lewe lailai ga na mate ena ligadra na sotia i Josua.

E raica rawa sara o Josua ni gauna ena buto mai kina na vanua ni sa dromu na siga, era na dro kece na sotia ni lima na tui ca oqo. Oqori na vuna a masuti Jiova kina o Josua qai kaya: ‘Matanisiga, tu vakadua!’ Era vakaotia gona kina na ivalu na Isireli ra qai qaqa tale ga ni cila tiko ga na siga.

E levu tale na tui ca e Kenani era dau cati ira na tamata ni Kalou. Rauta beka ni ono tale na yabaki sa qai vakamalumalumutaki ira na 31 na tui e Kenani o Josua kei na nona mataivalu. Ni oti oya sa qai wasea o Josua na vanua o Kenani vei ira na yavusa e se bera tu ni dua na nodra tikiniqele.

Oti tale e vica vata na yabaki, sa qai mate o Josua ni sa yabaki 110. Ena gauna taucoko a bula tiko kina o koya kei ira na nona ilala, era dau talairawarawa na Isireli vei Jiova. Ia ni sa takali yani o Josua kei ira na nona ilala, era se baci cakava tale na ka ca na Isireli. Era dau sotava ga kina na leqa. Oqori na gauna e vinakati dina kina na veivuke ni Kalou.