Ngewa ya 49: Syũa Yĩkĩũngama Ki
KWASISYA Yosua. Easya: ‘Syũa, ũngama ki!’ Nayo syũa yaũngama ki. Na yekala vau ĩtunĩ katĩ mũthenya mũima. Yeova nĩwe watumie ũu wĩthĩwa. Ĩndĩ ekai twone nĩkĩ Yosua wendaa syũa yĩendee na kwaa.
Yĩla asumbĩ atano athũku ma nthĩ ya Kanaani mambĩĩie kũkita na Angiveoni, Angiveoni nĩmatũmie mũndũ akamwĩte Yosua oke amatetheesye. Na mũndũ ũsu asya: ‘Ambata kwitũ mĩtũkĩ! Ũtũtangĩĩe! Asumbĩ onthe ma nthĩ yĩ iĩma nĩmokĩte kũkita na athũkumi maku.’
Na vate kweteela Yosua na aũme make onthe ma kaũ mathi. Namo maendie na maũũ ũtukũ mũima. Na yĩla mavikie Ngiveoni, asikalĩ ma asumbĩ asu atano matelema na mambĩĩa kũsemba makĩĩte. Nake Yeova ĩndĩ ausya mbua ya mavia manene kuma ĩtunĩ, namo asikalĩ ala makwie nũndũ wa kũtumbwa nĩ mavia asu ma mbua maĩ aingĩ kwĩ ala mooaiwe nĩ aũme ma kaũ ma Yosua.
Yosua nĩweene kana syũa nĩyakilyĩ kũthũa. Nĩkwakilyĩ kwĩthĩwa na kĩvindu, na asikalĩ aingĩ ma asumbĩ asu atano athũku maĩ matoloke. Kwoou kĩu nĩkyo kĩtumi Yosua wavoyie Yeova ayasya: ‘Syũa, ũngama ki!’ Nayo syũa yaendeea na kwaa, na weethĩa Aisilaeli nĩmatonya kũsinda kaũ vyũ.
Kũu nthĩ ya Kanaani kwaĩ asumbĩ angĩ aingĩ athũku ala mamenete andũ ma Yeova. Yosua na ita syake makuie ta myaka thanthatũ kũsinda asumbĩ 31 ma ĩ nthĩ. Yĩla ũu weekiwe, Yosua nĩwaĩkĩĩthisye kana nthĩ ya Kanaani nĩyaanĩw’a mbaĩ ila syaĩ na vata wa kũaĩwa isio.
Myaka mingĩ nĩyavĩtie, na ĩtina vyũ Yosua akw’a e na ũkũũ wa myaka 110. Ĩvinda yonthe yĩla we na anyanyae make maĩ thayũ, andũ nĩmamwĩw’aa Yeova. Ĩndĩ yĩla aũme asu aseo makwie, andũ mambĩĩa kwĩka maũndũ mathũku na malika thĩnanĩ. Ĩvinda yĩu nĩyo maĩ na vata mũnene vyũ wa ũtethyo wa Ngai.
Yosua 10:6-15; 12:7-24; 14:1-5; Asili 2:8-13.
Makũlyo
- Vaa visanĩ ũũ, Yosua easya ata, na nĩkĩ?
- Yeova atethisye Yosua na aũme make ma kaũ ata?
- Nĩ asumbĩ meana ma amaitha Yosua wasindie, na atũmĩie ĩvinda yĩana ata?
- Yosua aanisye nthĩ ya Kanaani nĩkĩ?
- Yosua akwie e na ũkũũ mwaũ, na nĩ kyaũ kyakwatie andũ ĩtina?
Makũlyo ma kwongeleela
- Soma Yosua 10:6-15.
Nĩ ũĩkĩĩthyo mwaũ twaĩlwe kwĩthĩwa naw’o ũmũnthĩ kũmanya kana Yeova nĩwaũngamisye syũa na mwei ki kwondũ wa Aisilaeli? (Yos. 10:8, 10, 12, 13; Sav. 18:3; Nth. 18:10)
- Soma Yosua 12:7-24.
Ũla kwa w’o ki watumie asumbĩ 31 ma Kanaani masindwa nũũ, na nĩkĩ ũndũ ũsu nĩ wa vata kwitũ ũmũnthĩ? (Yos. 12:7; 24:11-13; Kũt. 31:8; Lk. 21:9, 25-28)
- Soma Yosua 14:1-5.
Nthĩ yaanĩiw’e mbaĩ sya Aisilaeli ata, na ũndũ ũsu wĩonany’a ata ĩũlũ wa ũtiĩwa nthĩnĩ wa Valatiso? (Yos. 14:2; Isa. 65:21; Esek. 47:21-23; 1 Ako. 14:33)
- Soma Asili 2:8-13.
Ta Yosua nthĩnĩ wa Isilaeli, naaũ ũmũnthĩ masiĩĩaa momanyĩsyo ma ala makaĩĩte ũla mũĩkĩĩo? (Asi. 2:8, 10, 11; Mt. 24:45-47; 2 Ath. 2:3-6; Tito 1:7-9; Ũvu. 1:1; 2:1, 2)
