KʼARU yook xbʼaanunkil laj Josue? Laj Josue yook xyeebʼal: ‹Saqʼe, kanaqat aran!› Joʼkan naq li Saqʼe kikanaak saʼ xyi li choxa chiru jun kutan. Li Jehobʼa kibʼaanunk re aʼin. Qilaq kʼaʼut naq laj Josue kiraj naq li Saqʼe inkʼaʼ t-oq.

Naq ebʼ li oobʼ chi awabʼej re Canaan keʼok chi yalok rikʼinebʼ laj Gabaon, ebʼ laj Gabaon keʼxtaqla jun li winq chi xsikʼbʼal laj Josue re naq teʼtenqʼaaq. Li winq kixye re laj Josue: ‹Chalqat saʼ junpaat ut chooʼaakol! Chixjunilebʼ li awabʼej li wankebʼ saʼ li qasutam keʼchalk chi yalok rikʼinebʼ laamoos›.

Laj Josue ut ebʼ laj puubʼ kohebʼ saʼ junpaat chi xkolbʼalebʼ laj Gabaon ut keʼbʼeek chiru jun qʼoqyink. Naq keʼwulak rikʼinebʼ laj Gabaon, ebʼ laj puubʼ re li oobʼ chi awabʼej kʼajoʼ naq keʼxuwak ut keʼelelik. Joʼkan naq li Jehobʼa kixkut saʼ xbʼeenebʼ li nimla saqbʼach ut naabʼalebʼ laj puubʼ re Canaan keʼkamk. Joʼkan naq moko kʼihebʼ ta chik keʼxkamsi ebʼ laj puubʼ li keʼchalk chirix laj Josue.

Naq laj Josue kiril naq li Saqʼe yook chi ok, kiʼok xkʼaʼuxl xbʼaan naq ebʼ laj puubʼ re Canaan teʼeleliq naq tqʼoqyinoʼq. Joʼkan naq laj Josue kitijok chiru li Jehobʼa ut kixye: ‹Saqʼe kanaqat aran!› Naq li Saqʼe kikanaak saʼ xnaʼaj ebʼ laj Israel keʼelk chi ubʼej saʼ li yalok.

Abʼan toj naabʼalebʼ li awabʼej re Canaan xikʼ nekeʼril xtenamit li Yos. Chiru waqibʼ chihabʼ kiru laj Josue ut ebʼ laj puubʼ xsachbʼalebʼ li 31 chi awabʼej. Chirix chik aʼan, laj Josue kixjekʼi li tenamit Canaan saʼ xyanqebʼ li xteep laj Israel li maakʼaʼebʼ xnaʼaj.

Laj Josue kikamk naq wank 110 chihabʼ re. Naq toj yoʼyo laj Josue ut ebʼ li ramiiw, li tenamit kiʼabʼink chiru li Jehobʼa. Abʼan, naq laj Josue ut ebʼ li ramiiw keʼkamk, ebʼ laj Israel keʼok xbʼaanunkil li maaʼusilal ut keʼxkʼe ribʼ saʼ chʼaʼajkilal. Anaqwan aajel ru naq li Yos ttenqʼanq rehebʼ.