AKIMONA Yoshua. Ubena kwamba’mba: ‘Obewa juba, imanatu!’ Kabiji juba jaimene pakachi ka jiulu. Jabanjile pepi na kimye kya juba jimo. Yehoba ye wijimikile! Pano twaya tumone ene mambo Yoshua o akebejile’mba juba jitwajijile na kusama.

Bamfumu batanu batama ba mu Kenana byo batendekele kulwa na bena Gibeona, bena Gibeona batumine muntu kwi Yoshua amba bebakwasheko. Waambile’mba: ‘Iyai bukiji ko tuji mwitupulushe ne kwitukwasha; mambo bamfumu bonse bekala mu kyalo kya mitumba betubungulukila na kwitulwisha atweba bamingilo benu.’

Ponkapotu Yoshua ne bantu banji ba kulwa nkondo bayile. Baendele bufuku bonse. Byo bafikile ku Gibeona, bashilikale ba boba bamfumu batanu bachiine ne kunyema banyemene. Kepo Yehoba anokeshe mvula wa mabwe, kabiji bashilikale bafwile na uno mvula bavujile kukila boba bo baipayile ku bantu ba nkondo ba kwa Yoshua.

Yoshua wamwene kuba’mba juba ke jiye na kuzhika. Kabiji amba inge pafite bashilikale bavula ba bamfumu batanu batamine kwendapo baya. O ene mambo Yoshua o alombejile kwi Yehoba ne kwamba’mba: ‘Obewa juba, imanatu!’ Kabiji juba byo jatwajijiletu na kusama, bena Isalela bakonsheshe kushinda bulwi.

Mu Kenana mwajinga bamfumu bakwabo batamine bingi bashikilwe bantu ba Lesa. Papichile myaka itanu na umo pa kuba’mba Yoshua ne nzhita yanji bashinde bamfumu 31 bajinga mu ntanda. Byo bapwishishe kwibashinda, Yoshua waabenye ntanda ya Kenana ne kwiipana ku mikoka yakebelenga.

Papichile myaka yavula bingi, kabiji kyapeleleko Yoshua wafwile saka aji na myaka 110. Kimye kyonse kya bumi bwanji aye ne balunda nanji, bantu batwajijile na kukokela Yehoba. Pano bano bantu bawamine byo bafwile, bantu batendekele kuba bintu byatama ne kwibika mu lukatazho. Kino kyo kimye kyo bamukebeshe bingi Lesa kuba’mba ebakwashe.