Esimwititi 49: Ezuva tali sikama ndjikiti
TARA Josuwa. Age kuna kutanta asi: ‘Ezuva sikama ngorooro!’ Ano ezuva tali sikama ndjikiti. Alyo tali kara ngorooro mokatji keguru ezuva nalinye. Jehova ta yi ninki yi horoke! Nye tu tareni asi morwasinke Josuwa ana harere ezuva li twikire ngorooro kutema.
Vahompa vatano wovadona womosirongo saKanani apa vana kutameka kurwisa Vangibiyoni, Vangibiyoni tava tumu mugara gumwe kwaJosuwa a ka pure kombatero. Age ta ka tanta asi: ‘Genderera usimbu o wize kwetu! Yo tu popere! Vahompa navenye womosirongo sonondundu vana lipongaike va rwanese vakareli woge.’
Poopo Josuwa novakwayita vendi navenye makura tava zi. Awo tava gendi masiku mudima. Apa vana ya siki poNgibiyoni, vakwayita wovahompa vatano tava tjira nokuduka. Jehova makura ta ninki kamanya gomunene a gwe keguru, ano vakwayita wovanzi tava fu kwakamanya kupitakana ava va dipagere vakwayita vaJosuwa.
Josuwa ta mono asi ezuva ntaantani tupu li toke. Naku kara mundema, vakwayita wovanzi wovahompa vatano wovadona nava duka. Josuwa yiyo nye ana kanderere kwaJehova asi: ‘Ezuva sikama ngorooro!’ Ezuva apa lina kutwikira kutema, Vaisraeli makura tava manesa kufunda yita.
MoKanani simpe mwa kere vahompa wovanzi wovadona ava va nyenga vantu vaKarunga. Ayo tayi gusa Josuwa novakwayita vendi nomvhura ntazimwe va funde vahompa 31 mosirongo. Apa yina pu eyi, Josuwa ta ninki sirongo saKanani va si gawinwine marudi aga gana hepa simpe mukunda.
Nomvhura dononzi tadi piti po, ano Josuwa ta fu age ana kara nonomvhura 110. Apa ga kere age novakaume vendi awo vazuni, vantu ngava limburukwa kwaJehova. Nye apa va fire vagara wovawa ava, vantu tava tameke kurugana yininke yoyidona nokuza moudigu. Apa yipo nye vana hepa unene mbatero zaKarunga.
Josuwa 10:6-15; 12:7-24; 14:1-5; Vapanguli 2:8-13.
Mapuro
- Mefano, yinke ana kuuyunga Josuwa, ntani morwasinke?
- Ngapi omu ana vatere Jehova Josuwa novakwayita vendi?
- Vahompa vangapi wononkore ana fundu Josuwa, ntani siruwo sokuhura kupi yina gusa?
- Morwasinke ana gawinine Josuwa sirongo saKanani?
- Nomvhura daJosuwa dingapi da kara apa ana fu, ntani konyima zoyo yinke yina horokere kovantu?
Mapuro gokugwederera ko
- Resa Josuwa 10:6-15.
Ehuguvaro musinke twa kara nalyo naina, mokudiva asi Jehova ga ninkisire ezuva nokwedi yi sikame ndjikiti koIsraeli?
- Resa Josuwa 12:7-24.
Yilye ya tumbukilire nawa-nawa yokufunda vahompa 31 moKanani, ntani morwasinke eyi mulyo kwetu naina?
- Resa Josuwa 14:1-5.
Ngapi omu va ligawinine sirongo momarudi goVaisraeli, ntani eyi yinke ayi likida kuhamena maupingwa moParadisa?
- Resa Vapanguli 2:8-13.
Ngwendi Josuwa moIsraeli, wolye vana kukondera naina vantu mokusiga ukereli waJehova?
