TALA Yosua. Ovovele vo: ‘E ntangwa, ningama.’ E ntangwa mpe iningamene. E ntangwa iningamene muna kati kw’ezulu, lumbu kiamvimba. Yave wavanga wo. Kansi, yambula twazaya ekuma o Yosua kazolela vo e ntangwa yaningama.

Vava e ntinu ntanu miambi mia nsi a Kenani bayantika nwanisa esi Ngibone, Angibone batumini muntu kenda lomba lusadisu kwa Yosua. Ovovele vo: ‘Wiza nswalu, watuvuluza, kadi, e ntinu miawonso mia nsi mizidi nwanisa e ntaudi zaku.’

Vana vau o Yosua yo makesa mandi bele kubasadisa. Fuku wamvimba badiata. Vava baluaka kuna Ngibone makesa ma ntinu ntanu bamwene o wonga yo tina. I bosi, Yave ubasotolwele matadi mampwena matuka kun’ezulu. Makesa mafwila mu mvul’a matadi mengi ke mu awaya bavondwa kwa makesa ma Yosua ko.

O Yosua omwene vo e ntangwa se idimuka. Okuma se kufwa, ozevo ulolo wa makesa ma ntinu ntanu balenda tina. Muna kuma kiaki o Yosua osambidi kwa Yave vo: ‘E ntangwa, ningama.’ O kuma ke kwafwa nzaki ko, Aneyisaele bakala ye ntangwa ya sunda e vita.

Vena mpe ye ntinu miayingi miambi muna Kenani miamenganga nkangu a Nzambi. O Yosua yo makesa mandi mvu sambanu banwana mu fwasa ntinu 31 miayalanga muna nsi a Kenani. I bosi, o Yosua wakayanesa e nsi a Kenani kwa makanda ma Isaele.

Mvu miayingi miavioka, i bosi o Yosua ofwidi ye kimbuta kia mvu 110. Ekolo kazinganga ye akw’andi o nkangu walemvokelanga Yave. Kansi, vava wantu awaya ambote bafwa, o nkangu bayantika vang’o bi yo kuyisia mu mpasi. Eyayi i ntangwa bavwanga lusadisu lwa Nzambi o mfunu.