Icisimicisyo 49: Akasuba Kaimakana
LOLESYA Josyua. Alukulabila ati: ‘We kasuba, imakana!’ Nako akasuba kaimakana. Kaikala penka palya pakati keulu akasuba konse. BaYehoba balenge’ci ukucitika! Pano leka tubone umulandu Josyua alukufwaila akasuba ukutwalilila ukutula.
Ili imfumu isibipile sisanu isya mu calo ca Kanani syatatika ukulwa ne baGibyoni, abaGibyoni batuma umwalalume mu kulomba Josyua ati abofweko. Umwalalume alabila ati: ‘Iseni kuli fwebo bwangu! Tupulusyeni! Imfumu syonse isilukwikala mu calo ca mapili syabungana ukwisa mu kulwa ne bapyungisi benu.’
Penka apo Josyua ne balalume bakwe aba nkondo bonse baya. Baenda ubusiku bonse. Ili bafika ku Gibyoni, ifita fya mfumu sisanu fyatiina kabili fyatatika ne kubutuka. Eli baYehoba balenga amabwe amfula aakulu ukupona ukufuma kwiulu, kabili ifita ifingi fyafwa ku kutobaulwa ne mabwe amfula, ukucila ne fifyaipaiwa ku balalume ba nkondo abakwe Josyua.
Josyua abona ati bukumo lukoso akasuba kalukuwa. Palukufiita, kabili ifita ifingi ifya mfumu isibipile sisanu filukufyuka. Uyo e mulandu Josyua atembelela kuli baYehoba kabili eli alabila ati: ‘We kasuba, imakana!’ Kabili ili akasuba katwalilila ukutula, abaIsilaeli basilisya ukucimfye’nkondo.
Kuli na simbi isingi imfumu isibipile mu Kanani isipatile abantu ba baLesa. Caposa apepi ne myaka sisanu na umo pakweba’ti Josyua ne fita fyakwe bacimfye imfumu 31 mu calo. Ili ici cacitwa, Josyua asininkisya ukweba’ti icalo ca Kanani caabanwa muli yeyo imikoka iicili ilukupengela umupunda apakwikala.
Imyake’ingi yapita, kabili mukupelako Josyua afwa ili ali ne myaka 110. Yonse mpindi ili ye ne babyakwe bacili abalabi, abantu baumfwila baYehoba. Pano ili aba balalume abalungeme bafwa, abantu batatika ukucite’fintu ifibipile kabili baba mu kukatasiwa. Iyi e mpindi muli bucine balukufwaisya ukofwa kwa baLesa.
Josyua 10:6-15; 12:7-24; 14:1-5; Abasololwesi 2:8-13.
Ifyakwipusya
- Mu cikope, findo Josyua alukulabila, kabili ni pa mulandu wando?
- Kani baYehoba bamofwa syani Josyua ne balalume bakwe aba nkondo?
- Kani nisinge’mfumu isilwani Josyua acimfya, kabili capose’myaka inga pakweba’ti basicimfye?
- Mba nindo Josyua aabanisisya icalo ca Kanani?
- Myaka inga Josyua ali nayo ili afwa, kabili findo fyacitika ku bantu panuma yafyefyo?
Ifyakwipusya na fimbi
- Pendeni Josyua 10:6-15.
Ukwisiba ati baYehoba balilengele akasuba ne mwensi ukwimakana ku baIsilaeli, nibwisa bucetekelo tukwete muli bulelo? (Jos. 10:8, 10, 12, 13; Amasa. 18:3; Ifisi. 18:10)
- Pendeni Josyua 12:7-24.
Mba nibani muli bucine abalengele ati imfumu 31 isya mu Kanani basicimfye, kabili mba nindo ici cicindamine kuli fwebo muli bulelo? (Jos. 12:7; 24:11-13; Ndute. 31:8; Luku 21:9, 25-28)
- Pendeni Josyua 14:1-5.
Kani icalo calyabenwe syani ku fikoto fya baIsilaeli, kabili ifi filalangilile’ndo pa bupyani mu Paladaiso? (Jos. 14:2; Yisa. 65:21; Esic. 47:21-23; 1 Kol. 14:33)
- Pendeni Abasololwesi 2:8-13.
Ukupala Josyua mu Isilaeli, mba nibani muli bulelo abacicila abo abalukila baLesa? (Sol. 2:8, 10, 11; Mat. 24:45-47; 2 Tes. 2:3-6; Tito 1:7-9; Fisu. 1:1; 2:1, 2)
