TALA Yoshua. Unenanga’mba: ‘Dyuba, imana!’ Dyuba nadyo dibaimana. I dimane mūlu difuku dyonso dituntulu. I Yehova walonga uno muswelo! Ino tutalei kisakila Yoshua dyuba dyendelele na kumunika i kika.

Balopwe babi batano ba mu Kenani pa kwiya kulwa na Bene Ngibeone, Bene Ngibeone abatume muntu akalombole Yoshua aye ebakwashe. Uno muntu wanena’mba: ‘Iya bukidi kotudi! Iya witukūle! Balopwe bonso ba mu ngulu abaiya kulwa na bengidi bobe.’

Ponka’po Yoshua ne bana-balume ba bulwi abaenda. Abaenda bufuku bonso. Pa kufika ku Ngibeone, basola ba balopwe batano abakwatwa moyo ne kushilula kunyema. Penepo Yehova waponeja mabwe a mvula makatampe mu makumbi, basola bavule abafu na kupolwa na mabwe a mvula kutabuka boba baipaibwa na bantu ba bulwi ba Yoshua.

Yoshua wamone amba dyuba kedisa kupona. Pasa kwikala mfindi, basola bavule ba balopwe batano basa kunyema. O mwanda Yoshua walombe Yehova amba: ‘Dyuba, imana!’ Dyuba pa kwimana, Bene Isalela abamone muswelo wa kutambula bushindañani.

Kadi kudi balopwe bavule bakwabo bashikilwe bantu ba Leza mu Kenani. Yoshua ne basola bandi abalu kubwipi kwa myaka isamba mwanda wa kutyumuna balopwe 31 ba mu ino ntanda. Bino byonso pa kupwa, Yoshua wamone amba ntanda ya Kenani yabanibwe ku bisaka byadi kebyapelwe ntanda.

Pabapite myaka mivule, kupwa Yoshua wafu na myaka 110. Yoshua ne balunda nandi pobakidi bōmi, bantu i bakōkele Yehova. Ino bano bantu bayampe pa kufwa, bantu abaalula kulonga bintu bibi ne kumweshibwa malwa. Pano ye pokebasakilwa bukwashi bwa Leza.