KEʼYINKE Josué. Nxi tqʼamaʼn: ‹¡Weʼya Qʼij!› Kyajtzun weʼ Qʼij. Kyaj ten jun qʼij twitz kyaʼj. ¡Tuʼn Jehová bʼant jlu! Atzun jaʼle qo xnaqʼtzal tiʼj tiquʼn tajteq Josué tuʼn tkyaj weʼ Qʼij.

Tej kyok ten qeju jweʼ mya bʼaʼn ajkawil te Canaán qʼojel kyiʼj aj Gabaón, xi kysamaʼn aj Gabaón jun xjal qanel onbʼil te Josué. ‹¡Tzaj naja onil qiʼje te kolol qeye! Quʼn ma bʼaj kychmoʼn kyibʼ qe ajkawil aqeju najleqeʼ twiʼ witz tuʼn kyqʼojin qiʼje›. Chi xjal.

Xiʼtzun Josué kyukʼe kykyaqil tsoldad. I bʼet tkyaqil jun qonikʼen. Tejtzen kypon toj Gabaón e tzaj xobʼ qeju kysoldad jweʼ ajkawil ex i el oq. Tzajtzun t-xoʼn Jehová nimaq saqbʼaqun kyibʼaj, ik tzaʼn nimaq abʼj, ex mas nim soldad e kyim tuʼn saqbʼaqin kywitz qeju e kyim kyuʼn tsoldad Josué.

Tej tok tkiʼn Josué chʼixtaq tkux bʼaj Qʼij. Xi t-ximen qa ok qo okel yupj ex qa ok chi elel oq kysoldad qeju jweʼ mya bʼaʼn ajkawil. Tuʼntzunju, naʼn Dios Josué, tej tbʼaj naʼn Dios tma kyjalu: ‹¡Weʼya Qʼij!› Kyajtzun weʼ Qʼij, e kanbʼantzun aj Israel kyiʼj kyajqʼoj.

At txqantl mya bʼaʼn ajkawil toj Canaán aqeju ikʼon twitz ttnam Dios kyuʼn. Xi tiʼn chʼixme waqaq abʼqʼi tuʼn kykubʼ 31 ajkawil tuʼn Josué ex kyuʼn tsoldad. Tbʼaj jlu, kubʼ tpaʼn Josué txʼotxʼ kyxol qe tyajil aj Israel.

Tej tikʼ nim abʼqʼi, kyim Josué tej qʼiʼntaq 110 abʼqʼi tuʼn. Kukx nchi bʼintaq aj Israel te Jehová tej itzʼtoq Josué kyukʼe tamiw. Atzun tej kykyim e ok ten juntl maj aj Israel bʼinchal mya bʼaʼn ex okx kyqʼoʼn kyibʼ tjaqʼ mya bʼaʼn. Atzun jaʼle kyajbʼil tuʼn kytzaj onin tuʼn Dios.