Sturka 49

Lapta Ba Takaskan

JASUA ba kaiki kais. Witin naku aisisa: ‘Lapta, takas!’ Bara Lapta ba takaskan. Kasbrika lilapasra yu aiska kum takaskan. Jehova mita yaban baku takan! Sakuna kaisa kaikaia Jasua ba dia muni Lapta ba ban ingwi kabia want kan.

Kenan kingka saura matsip nani ba Gibiun uplika nani mapara aiklabaia wan taim, Gibiun uplika nani ba waitna kum Jasua ra blikan help makabaia dukyara. Witin wih win: ‘Isti pali yang nani ra bal, swaki wan saks! King il tnayara iwi nani ba sut bal yang nani maipara aiklabisa.’

Minitka ra Jasua ai aiklaklabrika nani aikuki impakan. Tihmia aiska impaki bangwan. Witin nani Gibiun ra wan taim, king matsip aiklaklabrika nani ba sirang iwi plapi bangwan. Bara Jehova kasbrika wina yaban ais ma walpa tara nani kauhwan, bara ais ma nani ba aiklaklabra nani kau ailal iki tikan, Jasua aiklaklabrika nani iki bangwan ba wal.

Jasua kaikan Lapta ba mahka dimuya kan. Tihmia iwuya kan, bara king saura matsip aiklaklabrika nani ailal ba sip kan plapi swakwi bangwaia. Baha mita Jasua Jehova ra ai pura suni win: ‘Lapta, takas!’ Bara Lapta ba kau ingni kan taim, Israel uplika nani ba sip kan aiklabi pura luaia.

Kenan ra king saura wala ailal nani bara kan, Gâd uplika nani ra misbara kaiki kan ba. Jasua bara ai aiklaklabrika nani ra, 6 mani baku brin naha kuntrika kingka nani 31 kan ba ra aiklabi pura luaia dukyara. Naha daukan ningkara, Jasua tasba ba yaban baiki sakan Israel kyamka tasba nit bangwi kan nani ba ra.

Pyua ailal luan bara, Jasua ba 110 mani bri kan pruan. Witin bara ai panika nani ba kau raya kan pyua ra, upla nani ba Jehova bila wali kan. Sakuna prui bangwan ningkara, upla nani ba saura dauki trabil nani ailal ra dimi kan. Nanara lika rait Jehova helpka ba nit taki bangwi kan.

Jasua 10:6-15; 12:7-24; 14:1-5; Wihta nani 2:8-13.