Historia 49

Tonaltsintli noteltia

XKITA Josué. Yejua kijtoua: ‘¡Xmotelti, Tonaltsintli!’ Niman Tonaltsintli noteltia se tonajli. ¡Jehová kichiua mapano yejuin! Matikitakan tleka Josué xkineki makalaki Tonaltsintli.

Ijkuak makuiltin tekiuajkej xkuakualtin itech Canaán peuaj kixnamikij Gabaón, gabaonitas kititlanij se tlakatl makijliti Josué makinpaleuikan. ‘¡Xuajla nikan kampa tinemij!’, kijtoua. ‘¡Xtechmakixtiki! Makuiltin tekiuajkej yopeujkej kimixnamikij motlakeualuan.’

Nimantsin yauej Josué iuan isoldados. Nejnemij nochi yeuajli ijkuak ajsij ipan ueyikalpan Gabaón, insoldados makuiltin tekiuajkej peuaj cholouaj pampa melak nomojtiaj. Jehová kichiua mauetsiki itech iluikak uejueyi tesiujtli, niman tesiujtli kinmiktia melak miyekej soldados, maka ken akin kimiktiaj isoldados Josué.

Josué kita ika Tonaltsintli ikalakis. Itlapoyauis, niman ika choloskej miyekej soldados tlen tekitij itech makuiltin tekiuajkej xkuakualtin. Ika yejon, Josué kichiuilia teoyotl Jehová niman kijtoua: ‘¡Xmotelti, Tonaltsintli!’ Pampa Tonaltsintli noteltia, israelitas ueli tetlanij ipan yejon guerra.

Noijki nemij oksekimej tekiuajkej ipan Canaán akin kitlauelitaj ikalpan toTajtsin. Josué iuan isoldados uejkauij kanaj chikuasen xiuitl niman ijkon kimiktiaj 31 tekiuajkej ipan yejon país. Ijkuak kichiuaj yejuin, Josué kinxexelouilia uejueyimej familias itech Israel, yejon país.

Panoua miyek xiujtin, niman Josué miki ijkuak kipiaya 110 xiuitl. Ijkuak yejua niman akin imiuan nouika ok yoltokej, tlaltikpakchanejkej kitlakamatij Jehová. San ika, ijkuak yejuamej mikij, tlaltikpakchanejkej kichiuaj tlen xkuajli niman nokalaktiaj ipan tlauejli. Aman kema kinekij makinpaleui toTajtsin.

Josué 10:6-15; 12:​7-24; 14:​1-5; Jueces 2:8-13.