WAK Josué. E ta bisando: ‘Solo, para ketu!’ I solo en bèrdat a para ketu. El a keda ei mes meimei di shelu pa henter un dia. Yehova a hasi esei sosodé! Pero laga nos mira pakiko Josué ke pa solo sigui bria.

Ora e sinku mal reinan di e tera di Kánaan a kuminsá bringa kontra e gabaonitanan, e gabaonitanan a manda un hòmber pidi Josué ousilio. El a bisa: ‘Bin serka nos lihé! Salba nos! Tur e reinan di e region di seru a bini pa bringa kontra bo sirbidónan.’

Josué i tur su hòmbernan di guera a bai umbes. Nan a marcha henter anochi. Ora nan a yega Gabaon, e sòldánan di e sinku reinan a haña miedu i nan a kuminsá kore. Anto Yehova a laga hagel grandi kai for di shelu, i e hagel a mata mas sòldá ku e hòmbernan di guera di Josué a mata.

Josué a mira ku pronto solo lo baha. Lo bira skur i hopi sòldá di e sinku mal reinan lo skapa. P’esei Josué a hasi orashon na Yehova anto despues el a bisa: ‘Solo, para ketu!’ I ya ku solo a sigui bria, e israelitanan por a kaba di gana e bataya.

Tabatin hopi mas mal rei na Kánaan ku a odia e pueblo di Dios. Tabata nesesario pa Josué i su ehérsito dediká rònt di seis aña pa derotá 31 rei di e tera. Despues di a hasi esei, Josué a perkurá pa e tera di Kánaan ser partí pa tur tribu ku tabatin mester di teritorio ainda.

Hopi aña a pasa, i Josué finalmente a muri na e edat di 110 aña. Tanten ku Josué i su amigunan tabata na bida, e pueblo a obedesé Yehova. Pero despues ku nan a muri, e pueblo a kuminsá hasi mal kosnan i a haña nan den difikultat. E ora ei sí nan tabatin mester di yudansa di Dios.

Josué 10:6-15; 12:7-24; 14:1-5; Huesnan 2:8-13.