යෝෂුවා දිහා බලන්න. එයා කියන්නේ ‘ඉර, නවතින්න!’ කියලයි. ඉර ඇත්තටම නවතිනවා. මුළු දවසක්ම ඒක අහස මැද නැවතිලා තියෙනවා. යෙහෝවායි මෙහෙම වෙන්න සලස්වන්නේ! ඒ වුණාට ඉර දිගටම පායන්න යෝෂුවාට ඕන කළේ ඇයි කියලා බලමු.

කානාන් දේශයේ ඉන්න නරක රජවරු පස්දෙනා ගිබියොන්වරුන්ට විරුද්ධව යුද්ධ කරන්න පටන්ගන්නවා. එතකොට ගිබියොන්වරු මිනිසෙක්ව යවනවා යෝෂුවාගෙන් උදව් ඉල්ලන්න. ‘ඉක්මනට එන්න! අපව බේරගන්න! ඔයාගේ වැඩකාරයන්ට විරුද්ධව යුද්ධ කරන්න කඳු රටේ හැම රජ කෙනෙක්ම ඇවිත්’ කියලා එයා කියනවා.

ඒ මොහොතේම යෝෂුවා එයාගේ යුද්ධ භටයන් හැමෝම එක්ක යනවා. මුළු රෑ පුරාම ඒගොල්ලො ගමන් කරනවා. ගිබියොන් දේශයට ආවාම, අර රජවරු පස්දෙනාගේ යුද්ධ භටයන් භය වෙලා දුවන්න පටන්ගන්නවා. එතකොට යෙහෝවා අහසෙන් ලොකු ගල් වැස්සක් වස්සවනවා. යෝෂුවාගේ යුද්ධ භටයන් අතින් මැරෙන අයට වඩා වැඩිදෙනෙක් මේ ගල් වැස්සෙන් මැරෙනවා.

යෝෂුවාට තේරෙනවා දැන් තව ටිකකින් ඉර බහින්නයි යන්නේ කියලා. රෑ වුණාම, නරක රජවරු පස්දෙනාගේ යුද්ධ භටයින්ගෙන් හුඟදෙනෙක් පැනලා යන්න පුළුවන්. ඒ නිසයි යෝෂුවා යෙහෝවාට යාච්ඤා කරලා, ‘ඉර, නවතින්න!’ කියලා කියන්නේ. ඉර පායලා තියෙද්දී ඉශ්‍රායෙල්වරුන්ට පුළුවන් වෙනවා යුද්ධයෙන් ජයගන්න.

දෙවිගේ සෙනඟට වෛර කරන තවත් රජවරු හුඟදෙනෙක් කානාන් දේශයේ ඉන්නවා. ඒ දේශයේ රජවරුන් 31දෙනෙක්ව පරාජය කරන්න යෝෂුවාටයි එයාගේ හමුදාවටයි අවුරුදු හයක් විතර ගත වෙනවා. මේක කළාට පස්සේ, ඉන්න තැනක් නැති ගෝත්‍රවලට යෝෂුවා කානාන් දේශය බෙදලා දෙනවා.

අවුරුදු ගානක් ගත වුණාට පස්සේ යෝෂුවා මැරෙනවා. මැරෙනකොට එයාගේ වයස අවුරුදු එකසිය දහයයි. එයයි එයාගේ යාළුවනුයි ජීවත් වෙලා ඉන්න කල් මිනිස්සු යෙහෝවාට කීකරු වෙලා ඉන්නවා. ඒත් මේ හොඳ අය මැරුණාට පස්සේ මිනිස්සු නරක දේවල් කරන්න පටන් අරගෙන කරදරවලට වැටෙනවා. ඒගොල්ලන්ට ඇත්තෙන්ම දෙවිගේ උදව් උපකාර ඕන වෙන්නේ එතකොටයි.