BONA Joshua. O ntse a re: ‘Letsatsi, ema o sa sute!’ Mme letsatsi le ema le sa sute. Le ema fela mo gare ga loapi letsatsi lotlhe. Jehofa ke ene a dirang gore le eme! Mme gone, a re bone gore ke ka ntlha yang fa Joshua a batla gore letsatsi le nne le ntse le tlhabile.

Fa dikgosi tse tlhano tse di bosula tsa mo nageng ya Kanana di simolola go lwa le Bagibeone, ba roma monna mongwe gore a ye go kopa thuso kwa go Joshua. O mo raya a re: ‘Tla kwa go rona ka bonako! Re boloke! Dikgosi tsotlhe mo kgaolong e e dithaba di tlile go lwa le batlhanka ba gago.’

Gone fela foo, Joshua le batlhabani ba gagwe ba a tsamaya. Ba lala ba tsamaya bosigo jotlhe. Fa ba goroga kwa Gibeone, masole a dikgosi tse tlhano a a tshoga mme a simolola go tshaba. Ka jalo, Jehofa o dira gore go ne matlapa a magolo a sefako go tswa kwa loaping, mme masole a a bolaiwang ke sefako, a mantsi go feta a a bolailweng ke batlhabani ba ga Joshua.

Joshua o bona gore letsatsi le tloga le phirima. Go tla fifala, mme bontsi jwa masole a dikgosi tse tlhano tse di bosula a tla tshaba. Ke sone se Joshua a rapelang Jehofa a re: ‘Letsatsi, ema o sa sute!’ Mme fa letsatsi le nna le ntse le tlhabile, Baiseraele ba kgona go lwa go fitlha ba fenya.

Go na le dikgosi tse dingwe tse dintsi tse di sa siamang mo Kanana tse di tlhoileng batho ba Modimo. Go tsaya Joshua le batlhabani ba gagwe mo e ka nnang dingwaga di le thataro go fenya dikgosi di le 31 mo lefatsheng leo. Fa ba sena go gapa lefatshe, Joshua o tlhomamisa gore naga ya Kanana e abelwa ditso tse di sa ntseng di tlhoka lefatshe.

Go feta dingwaga di le dintsintsi, mme kgabagare Joshua o a swa a le dingwaga di le 110. Fa ene le ditsala tsa gagwe ba sa ntse ba tshela, batho ba ikobela Jehofa. Mme fa banna bano ba ba molemo ba swa, batho ba simolola go dira dilo tse di bosula mme ba tsena mo mathateng. Ka nako eo, ke gone ba batlang gore Modimo a ba thuse.