SIO kia Siōsiua. ‘Okú ne pehē: ‘⁠La‘ā, tu‘uma‘u!’ Pea na‘e tu‘uma‘u ‘a e la‘aá. Na‘e tu‘u ‘i he langí ‘i he ‘aho kakato. Ko Sihova na‘á ne ‘ai ‘eni ke hokó! Ka tau vakai ange pe ko e hā na‘e fiema‘u ai ‘e Siōsiua ‘a e la‘aá ke kei ulo ai pē.

‘I he kamata ‘a e ngaahi tu‘i kovi ‘e toko nima ‘i he fonua ko Kēnaní ke tau‘i ‘a e kau Kipioné, na‘e fekau ‘e he kau Kipioné ha tangata ke ‘alu kia Siōsiua ‘o kole tokoni. Na‘á ne pehē: ‘⁠Ha‘u vave kiate kimautolu! Fakahaofi kimautolu! Ko e ngaahi tu‘i kotoa ‘o e fonua mo‘ungá kuo nau ha‘u ke faitau mo ho‘omou kau sevānití.’

Na‘e ‘alu atu leva ‘a Siōsiua mo ‘ene kau tangata taú hono kotoa. ‘I he poó kotoa na‘a nau laka atu. ‘I he‘enau a‘u ki Kipioné, na‘e ilifia ‘a e kau sōtia ‘a e ngaahi tu‘i ‘e toko nimá pea nau kamata ke hola. Pea na‘e toki ‘omi leva ‘e Sihova ha fu‘u ‘uha maka mei he langí, pea na‘e lahi ange ‘a e kau sōtia na‘e mate ‘i he ‘uha maká ‘iate kinautolu na‘e tāmate‘i ‘e he kau tangata tau ‘a Siōsiuá.

Na‘e sio ‘a Siōsiua ‘e vave ‘a e tō ‘a e la‘aá. Pea ‘e fakapo‘uli, pea ‘e tokolahi ‘a e hao ‘i he kau sōtia ‘a e ngaahi tu‘i kovi ‘e toko nimá. Ko e ‘uhinga eni na‘e lotu ai ‘a Siōsiua kia Sihova peá ne toki pehē: ‘⁠La‘ā, tu‘uma‘u!’ Pea ‘i he hokohoko atu ‘a e ulo ‘a e la‘aá, na‘e malava leva ‘a e kau ‘Isilelí ke faka‘osi mo ikuna ‘a e taú.

Na‘e ‘i ai mo e ngaahi tu‘i kovi kehe ‘i Kēnani ‘a ia na‘a nau fehi‘a ‘i he kakai ‘a e ‘Otuá. Na‘e fe‘unga mo e meimei ta‘u ‘e ono kia Siōsiua mo ‘ene kau taú ke nau ikuna‘i ai ‘a e ngaahi tu‘i ‘e toko 31 ‘i he fonuá. ‘I he ‘osi ‘a e me‘á ni, na‘e ‘ai ‘e Siōsiua ke vahevahe ‘a e fonua ko Kēnaní ki he ngaahi matakali na‘e kei fiema‘u kiate kinautolu ha feitu‘u ke nofo aí.

Hili ha ngaahi ta‘u lahi, pea na‘e mate ‘a Siōsiua ‘i hono ta‘u 110. ‘I he‘ene kei mo‘uí pea mo hono ngaahi kaungāme‘á, na‘e kei talangofua ai pē ‘a e kakaí kia Sihova. Ka ‘i he mate ‘a e kau tangata leleí ni, na‘e kamata leva ‘a e kakaí ke fai ‘a e ngaahi me‘a ‘oku kovi pea nau tō ai ki he faingata‘a. Ko e taimi ‘eni na‘e fu‘u fiema‘u ai ‘a e tokoni ‘a e ‘Otuá kiate kinautolú.