KʼELA ja Josué. Wan yaljel yabʼ ja Kʼaʼuji: «¡Kʼaʼuj, mok nijkan!». Jaxa it kʼot tekʼan. Snajtil ja kʼakʼu tini kan tekʼan bʼa junxta slugar bʼa satkʼinal. ¡Jyoba yeʼnani skʼulan aʼekʼ jachuk! Pe la kiltik jas yuj ja Josué mi skʼana ja Kʼaʼuji amukxuk.

Yajni ja tantik joʼe mandaranum bʼa xchonabʼil Canaán kʼe tiroʼanuke smok ja Gabaón, ja swinkil Gabaón sjekawe jun winik bʼa waj skʼanyi skoltajel ja Josué. Ja yeʼn yala: «¡Laʼ jmoktikon weʼgo sok koltayotikon! Spetsanil ja mandaranum jumasaʼ matik mojan aye jmoktikoni wane tiroʼanel soka wa waʼtijum jumasaʼ».

Josué soka skʼakʼanum jumasaʼ weʼgoxta wajye. Bʼejyiye snajtil akʼwal. Yajni kʼotye bʼa Gabaón, ja kʼakʼanumik ja bʼa tantik joʼe mandaranumi xiwye sok kʼe spak-e ajnel. Anto Jyoba yaʼakan akoʼuk niwak bʼat bʼa satkʼinal, sok ja bʼati masni aʼay smila ja kʼakʼanumiki yuja janekʼ smilawe ja skʼakʼanum ja Josué.

Josué yila ojxta mukxuk ja Kʼaʼuji, sok jitsan ja skʼakʼanum ja tantik joʼe mandaranumi oj spak-e ajnel. Ja yuj ja Josué yaʼ yi orasyon ja Jyoba sok tsaʼan yala: «¡Kʼaʼuj, mok nijkan!». Yajni ja Kʼaʼuji wan ijlabʼanel, ja israʼelenyo skʼulane ganar ja tiroʼaneli.

Pe cha ayni pilan tantik mandaranum ja bʼa Canaán wa xyilkʼujolane ja xchonabʼil ja Dyosi. Josué soka skʼakʼanumiki yiʼaj yujile jun wake jabʼil bʼa chʼak xchʼaye snajel ja 31 mandaranumik ja bʼa Canaán. Yajni chʼak kʼulaxuk ja it, Josué skʼulan ja chonabʼi a-spil sbʼaje ja luʼumi ja bʼa kʼoleʼik matik oj makunukyuji.

Ekʼ jitsan jabʼil, soka Josué chami yajni ayxa yiʼoj 110 jabʼil. Yajni ja yeʼn soka yamigoʼiki sakʼanto aye, ja ixuk winiki wa skʼuʼane ja Jyoba. Pe yajni ja yeʼnle chamyeʼi, ja israʼelenyo wa skʼulane bʼa mi lekuk sok wa xchʼika sbʼaje bʼa wokol. Ja yujil ja weʼgo cha wanxa ni skʼanawe skoltajele bʼa Dyos.