HI NGA cuwuka Joxua. Yena i ngalo: ‘Gambo, yima!’ A gambo gi yima futsi. Gi yima a siku gontlhe kwale xikari ka matilo. Hi Jehova a zi mahisako! Kanilezi a hi woneni a ku hikuyini Joxua a lava lezaku a gambo gi simama ku woninga.

Laha a ntlhanu wa tihosi to biha ta lomu tikweni ga Kanani ti sangulako kulwa ni vaGibeoni, a vaGibeoni va rumela wanuna a ku ya kombela xivuno ka Joxua. Yena a yaku: ‘Tana ka hina hi kuhatlisa! Hi ponise! Tontlhe tihosi ti akileko le zitsungeni ti tile ku talwa ni malanza ya wena.’

Zalezo Joxua ni masochwa yakwe wontlhe va famba. Va famba wusiku gontlhe. Loku vona va chikela Gibeoni, a masochwa ya tihosi ta ntlhanu ma su chava ma sangula ku tsutsuma. Makunu Jehova i nisa maralala ya hombe hi le hehla, ni masochwa yo tala mafa hi ku biwa hi maralala a ku hunza lawa ma dawako hi masochwa ya Joxua.

Joxua i wona lezaku nzeni ka xikhatanyana a gambo gi ta pela. Ku tava munyama, ni masochwa yo tala ya tihosi to biha ta ntlhanu ma ta tsutsuma. Lezo hi zona zi mahako lezaku Joxua a khongela ka Jehova aku: ‘Gambo, yima!’ Ni laha a gambo gi simamako ku woninga, a vaIsraeli va zi kota ku mbhetisa a ku hlula a kulwa.

Ka ha hi ni tihosi to tala to biha lomu Kanani leti ti vengako vanhu va Nungungulu. Joxua ni butho gakwe va mbheta xipimo xa ntlhanu wa malembe ni ginwe kasi ku hlula a 31 wa tihosi ta lomu tikweni. Loku va mahile lezo, Joxua i maha lezaku a tiko gi avanyiselwa ka tixaka leti ta ha lavako wutshamu.

Ku hunza malembe yo tala, hi kugumesa Joxua afa na a hi tangeni ya 110 wa malembe. Laha yena ni vanghana vakwe va ha hanyako, a vanhu va ingisa Jehova. Kanilezi loku a vavanuna lavo va va nene va file, a vanhu va sangula ku maha zilo zo biha va ti nghenisa kuxanisekeni. Lezi hi kona hakunene va nga ni xilaveko xa ku vuniwa hi Nungungulu.