ILAWIL te Josué. Jich yak ta yalel: ¡Kʼajkʼal, koma aba ta beel! Jich tejkʼaj te Kʼajkʼale. Jteb ma la sta jun kʼajkʼal te la skom sba ta beel ta yolil chʼulchan. ¡Jaʼ te Jehová te jich la yakʼ kʼotuk ta pasele! Jaʼukmeto yame kiltik bael bin yuʼun te Josué la skʼan te yakuk xtilxan te Kʼajkʼale.

Kʼalal te joʼtul chopol ajwaliletik yuʼun te skʼinal Canaán jajchik ta yakʼbeyel guerra te Gabaone, te gabaonetik la stikunik bael jtul winik ta stojol Josué ta skʼanel koltayel. ¡Laʼme ta ora ta jtojolkotik!, xchi ta yalel te winike. ¡Koltayawonkotik! Spisil te ajwaliletik te nainemik ta witstikil yak ta skontrainel te j-abatetik awuʼune.

Jich oranax bajtʼ te Josué sok te swiniktak yuʼun guerra. Sjunal ajkʼabal beenik bael. Te kʼalal kʼotik ta Gabaón, te soldadoetik yuʼun te joʼtul ajwaliletike xiwik sok lokʼik bael ta anel. Jich te Jehová la yakʼ tal kʼalal ta chʼulchan niwak batetik, jaʼ bayalxan lajik soldadoetik yuʼun te niwak batetik te bitʼil milotik yuʼun swiniktak yuʼun guerra te Josué.

Te Josué la yil te nopol ya xtupʼix bael te Kʼajkʼale. Ya x-ijkʼubix te kʼinale, jaʼ yuʼun bayal ta jtul soldadoetik yuʼun te joʼtul chopol ajwaliletik anik bael. Jich yuʼun te Josué la skʼopon te Jehová, jich la yal: ¡Kʼajkʼal, koma aba ta beel! Te kʼalal yakto ta tilel-a te Kʼajkʼale, laj yoʼtanik ta yakʼel guerra te israeletike.

Ay yantikxan chopol ajwaliletik ta Canaán te la spʼajik te lum yuʼun te Dios. Te Josué sok te soldadoetik yuʼune jalajikniwan bael wakeb jaʼbil ta stsalel ta guerra te 31 ta jtul ajwaliletik yuʼun te nación Canaán. Te kʼalal yaʼiyojikix tsalaw-ae, te Josué la spuk te kʼinal ta swenta te jujunchajp stsʼumbal Israel te maʼyuk skʼinalike.

Te kʼalal kʼax bayal jaʼbil, laj te Josué kʼalal ayix 110 yaʼbilal-ae. Te kʼalal kuxulto-a te Josué sok te sjoʼtake, la schʼuumbeyik smantal Jehová te israeletike. Jaʼukmeto te kʼalal lajik baele, jajch spasik te bin chopol te ants winiketike, jaʼ yuʼun la staik bayal wokol. Jich la skʼanik koltayel yuʼun te Diose.