Vhonani Yoshua. U khou ri: ‘Ḓuvha, ima!’ Nahone ḓuvha ḽa ima. Ḽa ima henefhaḽa vhukati ha lutombo ḓuvha ḽoṱhe. Yehova o ita uri zwi itee! Fhedzi kha ri vhone uri ndi ngani Yoshua o ṱoḓa uri ḓuvha ḽi dzule ḽi tshi penya.

Musi khosi ṱhanu mmbi dza Kanana dzi tshi thoma u lwa na Vhagibeoni, Vhagibeoni vha ruma munna uri a ye u humbele thuso kha Yoshua. A ri: ‘Iḓa kha rine nga u ṱavhanya! Ri tshidze! Khosi dzoṱhe dza dzithavhani dzo ḓa u lwisa vhalanda vhau.’

Nga u ṱavhanya Yoshua na vhanna vhawe vhoṱhe vha u lwa vha ya. Vha tshimbila vhusiku hoṱhe. Musi vha tshi swika Gibeoni, maswole a khosi ṱhanu a ofha a thoma u shavha. Zwenezwo Yehova a ita uri matombo mahulu a tshifhango a we a tshi bva lutomboni, nahone maswole manzhi a fa nga u rwiwa nga tshifhango a fhira e a vhulawa nga vhanna vha Yoshua vha u lwa.

Yoshua a vhona uri nga u ṱavhanya ḓuvha ḽi ḓo kovhela. Ho vha hu tshi ḓo swifhala, nahone vhunzhi ha maswole a khosi ṱhanu mmbi o vha a tshi ḓo shavha. Ndi nga hone Yoshua o rabela Yehova a ri: ‘Ḓuvha, ima!’ Musi ḓuvha li tshi dzula ḽi tshi penya, Vhaisiraele vha kona u fhedza u kunda nndwa.

Ho vha hu na dziṅwe khosi mmbi Kanana dze dza vhenga vhathu vha Yehova. Zwa dzhiela Yoshua na mmbi yawe miṅwaha i linganaho rathi u kunda khosi dza 31 shangoni. Yoshua a konou kovhela shango ḽa Kanana tshaka dze dza vha dzi kha ḓi ṱoḓa shango.

Ha fhira miṅwaha minzhi, nahone Yoshua a fa e na miṅwaha ya 110. Ene na khonani dzawe vha tshi tshila, vhathu vha thetshelesa Yehova. Fhedzi musi vha tshi fa, vhathu vha thoma u ita zwithu zwivhi vha dzhena khomboni, vha ṱoḓa thuso ya Yehova.

Yoshua 10:6-15; 12:7-24; 14:1-5; Vhahaṱuli 2:8-13.