AMLOLE Yoswajo. Akuŵeceta kuti: ‘Lyuŵa, jimani!’ Ni lyuŵalyo likwima. Kwa lisiku lyosope likwima pamalo gamo pasikati pasyesyene kwiwunde. Yehofa akuyitendekasya yeleyo! Nambo kwende tulole ligongo lyakwe Yoswa akusaka kuti lyuŵa lijendelecele kuŵala.

Mayimwene msano gakusakala gala ga m’cilambo ca Kanani pagakutanda kuputana ni Agibeoni, Agibeoniwo akumtuma mundu kukuŵenda cikamucisyo kwa Yoswa. Akuŵeceta kuti: ‘Ayice kwa m’weji mwacitema! Atukulupusye! Acayimwene wosope ŵa kumkuli wa matumbi ayice kukuputana ni ŵakutumicila ŵawo.’

Ndema jijojo Yoswa ni acalume ŵakwe ŵakuputa ngondo akunyakuka. Akwenda cilo cosope. Payice ku Gibeoni, asilikali ŵa mayimwene msano ŵala akogopa, nikutanda kutila. Sambano Yehofa akutendekasya maganga ga matalila gamakulungwakulungwa kugwa kutyocela kwiwunde, soni asilikali ŵajinji akuwa ligongo lyakwagwila maganga ga matalilago kulekangana ni mwakuwila asilikali ŵakuputigwa ni acalume ŵangondo ŵa Yoswa.

Kaneko Yoswa akuyiwona kuti lyuŵa cilikapile pacangakaŵa. Cikuŵe cipi, soni asilikali ŵa mayimwene msano ŵala catile. Ni ligongo lyakwe Yoswa akupopela kwa Yehofa, kaneko nikuŵeceta kuti: ‘Lyuŵa, jimani!’ Sambano lyuŵa lila palikwendelecela kuŵala, Ayisalayeli akupakombola kumalisya kuputa ngondo jila, nipo jikwajendela cenene.

Mu Kanani mwanasoni mayimwene gakusakala gamajinji gagakwaŵenga ŵandu ŵa Mlungu. Yikwajigalila yaka 6 kuti Yoswa ni asilikali ŵakwe amalisye kugomeka mayimwene 31 ga m’cilamboco. Pamalisisye kwagomeka acimmagongowo, Yoswa akucigaŵila cilambo ca Kananico kwa mitundu ja Ayisalayeli jajaliji mkanijipate malo gakutama.

Yaka yejinji yikupita, kaneko Yoswa akuwa ali akwete yaka 110. Mundaŵi josope jaŵaliji cijumi jwalakwejo ni acimjakwe, ŵandu ŵapikanilaga Yehofa. Nambo ŵandu ŵamboneŵa paŵagambile kuwa, ŵandu ŵatandite kutenda yindu yakusakala ni ŵasimanaga ni yakusawusya. Ndaŵi jeleji ni jaŵasosekwaga mnope cikamucisyo ca Mlungu.