BIBIʼ a Josué. Láabu raniʼ: ¡Govitz, diti saalo! Né Govitz riaʼanni toibsi lagary. Diti rasaani guidopynac dzú. ¡Ni rony ndeʼ ngú Jehová! Per guisuidyno xigony Josué ná que Govitz guisaní.

Órni gáay buñguieeu mal ni rony mandary gudx Canaán rasaló racalóyibu gudx Gabaón, gabaonitas raxelyibu toib buñguieeu par tze tzágudx Josué par gacné layibu. Né buñguieeu reʼ ranibu: ¡Godaʼ ro nóodo ni maca! ¡Bilaa lóodo! Gáay buñguieeu ni rony mandary stipnés gudx cacalóbu lóodo.

Órcuca Josué né guirá soldad xtuny rieyibu par gacnéyibu gabaonitas. Rasaayibu guidopynac gueʼel. Órni radxiinyibu gudx Gabaón, guirá soldad xtuny gáay buñguieeu reʼ radzuibyibu né rasaló raxonyibu. Ór cú Jehová rony que guiab laver ropdann, né raity más soldad por laver que ni ragaity soldad xtuny Josué.

Josué rabíbu que Govitz mápa mer tzaʼisni. Ma tzógueʼel, né xidal soldad xtuny gáay buñguieeu mal reʼ saxonyibu. Por ngú, Josué raninébu Jehová né ór cú ranibu: ¡Govitz, diti saalo!ʼ Né órni Govitz casaníni, israelitas labúu ronyibu gann.

Noʼ stipnés buñguieeu mal ni rony mandary gudx Canaán ni rianladx xcudx Dios. Josué né guirá soldad ni noʼ né láabu, xhoop íz rinéni layibu par guinitlóyibu guirá buñguieeu ni rony mandary 31 gudxrop. Órni bilox bunybu ndeʼ, Josué ratzóobu gudx Canaán par guirá family ni caquiin layoo.

Radudy xidal íz, né Josué raity órni napbu 110 íz. Laʼga Josué né ximigyibu nabany, buñ rasob Jehová. Per órni goityibu, buñ rony cós mal né rioʼyibu ló galnagan. Nigoreʼ ma raquiinyibu que Dios gacné layibu.