KONPULU wedake dungu mu, tati pu Israel che mütrümfingün ta Jewba. Fey llowdunguy ­elufi llükakenochi longkolelu ñi ­kelluaetew. Chi Biblia mew pu kues ­pingekefuy. Josue wünen kues ngefuy, ka kakelu kues inan-ngeyngün: Otniel, Aod, ka Samgar. Welu epungechi pu che kellufilu Israel domo ngey, tüfachi domo Debora ka Jael pingekefuy engu.

Debora pelon domo ngey. Jewba feypikeeyew chem dungu ñi rupayal küpalechi antü mu, Debora fey kimelkefi ta pu che chem pin ta Jewba. Debora ka kues ngerkey. Anükünuwkey minche kiñe palmera anümka wingkul mapu mew, ka tati pu che küpakey chew ñi mülen Debora ñi kelluaetew ñi norümal ñi wedake dungu engün.

Feychi antü mu Jabin rey ngekefuy Kanaan mapu mew. Niey aylla pataka awkan karreta. Fütra newen-niey ñi pu awkafe (weychafe), ta fentren Israel che konayerpufi Jabin mew. Feychi longkolelu Jabin ñi pu awkafe, Sisara pingey.

Kiñe antü Debora mütrümfi ta kues, Barak pingelu, feypifi: ‘Jewba feypi: “Nünge mari warangka wentru ka yefinge engün Tabor wingkul mew. Iñche küpalelayu Sisara. Iñche eluayu eymi tami wewafiel Sisara ka tañi pu awkafe.”’

Barak feypifi ta Debora: ‘Eymi amulmi, iñche amuan.’ Debora amuy, welu feypifi ta Barak: ‘Sakin-ngelayaymi ti wewkayñen dungu mew, Jewba wülafi Sisara kiñe domo ñi kuwü mew.’ Ka feychi dungu femngechi rupay.

Barak nagpay Tabor wingkul mu ñi kewayafiel Sisara ñi pu awkafe engün. Müchay müten, Jewba eluy kiñe mangiñ ko, ka fentren kayñe ürfingün. Sisara nagi ñi awkan karreta mu, fey lefmawi.

Pichin (püchün) mu Sisara akuy Jael ñi tolto ruka mew. Jael ‘konpange’ pieyew, ka elufi pichin lichi ñi pütokoal. Tüfa küpa umawi, ka pürüm umawtuy. Feymew Jael nüy kiñe üngko ñi tolto ruka mew, ka chükadtükulelfi ñi longko mew. ¡Fey wüla küpalu Barak, pengelfi Sisara ñi lan! Kom ñi feypin Debora, femngechi tripay.

Af mew ti longkolelu Jabin langümngey, ka pichiñma mu pu Israel che tüngünküley engün.