ISRAELITANAKAX jan walin uñjasipkän ukhaxa, Jehová Diosaruw artʼasipxäna. Diosax jan axsariri yanaptʼirinak churasaw mayisïwinakaparux istʼäna. Uka yanaptʼirinakax Biblianxa jilïrinak satawa mä arunxa taripirinaka. Josué tataw nayrïr taripirïnxa, qhipatxa: Otoniel, Aod ukat Samgar sat taripirinakarakiw utjäna. Ukampis pä warmiw Israel markar yanaptʼäna, Débora, Jael sat warminakänwa.

Deborasti Diosat parlir warmïnwa. Jehová Diosax kunatï jutïrin pasañapäki uka tuqinakatwa jupar yatiyäna, ukat Diosan arunakap yatiyäna. Deborax taripirirakikïnwa. Palmera sat quqa jakʼankirïnwa, ukaruw jaqinakax jan waltʼäwinak askichañ yanapayasiñatakix sarapxirïna.

Ukapachax Canaananxa Jabín sat tataw apnaqaskäna. Nuwasiñatakix 900 carronakanïnwa. Walja soldadonakanïnwa, ukatwa yaqhip israelitanakarux katuntasin irnaqayapxäna. Soldadonakapan pʼiqtʼiripax Sísara satänwa.

Mä urusti Deborax Barac sat taripiriruw jawsäna, ukat akham sänwa: ‘Jehová Diosax akham siwa: “10.000 chachanakamp chika Tabor sat qullur sarma. Ukaruw Sisarar irpanï. Ukanwa Sisararusa soldadonakaparusa nayax atipayäma” sasa’.

Baracax akham sänwa: ‘Jumatï nayamp chika saräta ukhax nayax saräwa’ sasa. Iyaw sasaw Deborax saräna, ukampis Deborax akham sänwa: ‘Atipäta ukhaxa janiw jachʼañchapkätamti, kunattix mä warmin amparaparuw Jehová Diosax Sisaran jakäwip churani’ sasa. Ukat ukhamaw phuqasïna.

Baracax Tabor qullut saraqäna Sisaran soldadonakapamp nuwasiñataki. Akatjamat Jehová Diosax um apayanïna, ukan uñisirinakapax wal jiwarapxäna. Sisarax carrot saraqasaw tʼijtxäna.

Uka qhipatxa Sisarax Jael warmin utaparuw purïna. Jaelasti utar katuqasaxa, lech waxtʼäna. Ukat lechex ik puriyäna, ukat ukanwa iktʼxäna. Iktʼataruw Jaelax mä chʼakurumpi pʼiqit jununtäna. ¡Ukat Baracax purinkän ukhaxa, Jaelax amayak uñachtʼayxäna! Kuntï Deborax siskatayna ukax phuqasïnwa.

Qhiparuw Jabinar jiwayxapxäna; ukat mä jukʼa tiempox israelitanakax suman sarnaqasipxäna.