ILYO abena Israele baali mu bwafya, balombele Yehova ukubafwa. Yehova alyaswike no kubapeela intungulushi ishashipa isha kubafwa. Baibolo ita ishi intungulushi ati abapingushi. Yoshua e wali umupingushi wa kubalilapo, na bapingushi bambi abakonkelepo ni Oteniele, Ehudi, na Shamigari. Lelo pa baleafwa abena Israele pali na Debora na Yaele.

Debora ali ni kasesema mwanakashi. Yehova alimwebele ifyali no kucitika ku ntanshi, na o aebele abantu ifyo Yehova asosele. Debora kabili ali ni kapingula. Aleikala mwi samba lya cimuti mu calo ca mpili, kabili abantu baleya kuli ena pa kuti abaafwe pa mafya balekwata.

Pali ilya nshita, Yabini e wali imfumu ya mu Kanaani. Akwete amaceleta ya nkondo 900. Abashilika bakwe baali abakosa ica kuti balipatikishe abena Israele abengi ukuba abasha ba Mfumu Yabini. Umukalamba wa bashilika ba Mfumu Yabini ali ni Sisera.

Bushiku bumo Debora aitile Baraki Umupingushi no kumweba ati: ‘Yehova atile: “Senda abaume 10,000 no kuya nabo pa Lupili lwa Tabore. Nkatuma Sisera ukwisa uko. Nkalenga ukamucimfye pamo na bashilika bakwe.”’

Baraki aebele Debora ati: ‘Nga wasumina ukukonka e lyo nkaya.’ Debora aliile nankwe, lelo aebele Baraki ati: ‘Te iwe bakatasha pa kucimfya mu nkondo, pantu Yehova akabomfya umwanakashi ku kwipaya Sisera.’ Kabili ifi fine e fyacitike.

Baraki aliile ku Lupili lwa Tabore ku kukumanya abashilika ba kwa Sisera. Awe amwene fye Yehova alenga kwaba amenshi ayengi na bashilika abengi abalebasansa balinwenene. Lelo Sisera aikiile pe celeta lyakwe no kubutuka.

Pa numa ya nshita iinono, Sisera aile kwi tenti lya kwa Yaele. Yaele aebele Sisera ukwingila mu kati. Ilyo aingile, amupeele umukaka uwalengele omfwe utulo. Papitile fye inshita inono, Sisera apona na mu tuulo. Lyena Yaele abuulile icimuti icasongoka no kucipusha mu mutwe wa kwa Sisera. Pa numa, ilyo Baraki aishile, amulangile apali Sisera ninshi nafwa! Nga fintu wamona, ifyo Debora alandile fyalicitike.

Imfumu Yabini nayo basukile baipaya, na bena Israele baishileba no mutende na kabili pa nshita inono.