Stori 50: Tu Woman We Tufala i No Fraet
TAEM ol man Isrel oli kasem trabol, oli krae long Jeova blong i halpem olgeta. Jeova i ansa long olgeta, i putumap ol lida we oli no fraet, blong givhan long olgeta. Baebol i kolem ol lida ya se ol jaj. Faswan jaj, hemia Josua. Mo sam jaj biaen long hem, i gat Otniel, Ehud mo Samgara. Be i gat tu woman we tufala i givhan long ol man Isrel tu, nem blong tufala Debora mo Jael.
Debora i wan woman profet. Jeova i givim save long hem long saed blong ol samting we bambae i mas kamaot, nao hem i talemaot ol tok ya long ol man. Debora i wan jaj tu. Hem i sidaon long sado blong wan pamtri long ples blong ol hil, mo ol man oli kam luk hem blong i givhan long olgeta blong stretem ol trabol blong olgeta.
Long taem ya, Jabin i king blong Kenan. Hem i gat 900 kat blong faet. Ol soldia blong hem oli strong tumas, mekem se oli fosem plante man Isrel blong kam ol slef blong Jabin. Komanda blong ami blong King Jabin, hemia wan man we nem blong hem Siseraha.
Wan dei, Debora i singaot Jaj Barak blong i kam luk hem. Taem hem i kamtru, Debora i talem long hem se: ‘Jeova i talem long mi blong mi talemaot tok blong hem long yu se: “Yu go singaot 10,000 man nao yu tekem olgeta oli go long Hil ya Taboro. Bambae mi tekem Siseraha i kam mekem faet long yufala long ples ya. Be bambae mi mekem we yufala i winim hem mo ol ami blong hem.” ’
Barak i talem long Debora se: ‘Sipos yu kam wetem mifala, bambae mi save go, be sipos yu yu no kam, bambae mi tu mi no save go.’ Ale, Debora i talem se bambae hem i go. Be hem i talem long Barak se: ‘Sipos yufala i winim faet, bambae i no yu we yu karem haenem from samting ya, from we Jeova bambae i putum Siseraha long han blong wan woman.’ Mo hemia nao samting we i hapen.
Ale Barak i aot i godaon long Hil ya Taboro blong mekem faet long ol ami blong Siseraha. Wantaem nomo, Jeova i mekem bigfala ren i folfoldaon i draonem olgeta ples. Plante soldia blong ol enemi blong Isrel oli lus long bigfala wota ya. Be Siseraha i jam daon long kat blong hem, i lego kat ya, i resis, i ronwe.
Smoltaem biaen, Siseraha i kamtru long haos tapolen blong Jael. Jael i singaot hem i kam insaed, mo hem i tekem sam melek, i givim long hem blong i dring. Melek ya i mekem Siseraha i taed we i taed, mo i no longtaem, hem i slip we i no moa harem wan samting. Nao Jael i go tekem wan hama mo wan sotfala stik we i sapgud, we i blong taetem rop blong haos tapolen long hem. Hem i kam klosap long ples we rabis man ya i stap slip long hem, nao wantaem nomo, i hamarem stik ya long hed blong hem, nao man ya i ded. !Taem Barak i kamtru, Jael i soem dedman ya Siseraha long hem! Ale, yu save luk se ol tok we Debora i bin talem, i kamtru.
Biaen, oli kilim King Jabin tu i ded, mo blong smoltaem, i gat pis bakegen mo ol man Isrel oli stap kwaet.
Jajes 2:14-22; 4:1-24; 5:1-31.
Ol Kwestin
- ?Hu ya ol jaj? ?Wanem nem blong sam long olgeta?
- ?Wanem spesel wok we Debora i kasem, mo olsem wanem hem i mekem wok ya?
- ?Taem King Jabin mo komanda blong ami blong hem Siseraha i wantem mekem faet long Isrel, Jeova i givim wanem tok long Debora blong hem i talem long Jaj Barak? ?Debora i talem se hu bambae i karem haenem taem Isrel i win?
- ?Olsem wanem woman ya Jael i soem se hem i no fraet?
- ?Wanem i hapen afta we King Jabin i ded?
Sam narafala kwestin
- Ridim Jajes 2:14-22.
?Olsem wanem ol man Isrel oli mekem Jeova i kros? ?Wanem lesen we yumi lanem from samting ya? (Jaj. 2:20; Prov. 3:1, 2; Esik. 18:21-23)
- Ridim Jajes 4:1-24.
?Wanem lesen long saed blong bilif mo fasin no fraet we ol Kristin woman tede oli save lanem from eksampol blong Debora mo Jael? (Jaj. 4:4, 8, 9, 14, 21, 22; Prov. 31:30; 1 Kor. 16:13)
- Ridim Jajes 5:1-31.
?Olsem wanem singsing we Barak mo Debora i wokem taem oli win, i olsem wan prea long saed blong faet ya blong Amagedon we i klosap? (Jaj. 5:3, 31; 1 Kron. 16:8-10; Rev. 7:9, 10; 16:16; 19:19-21)
