Maana 50nan

Muso jagɛlɛn fila

NI ISRAƐLKAW tun ye gɛlɛya lase u yɛrɛ ma, u tun bɛ kule ka Jehova wele. Jehova tun bɛ ɲɛminɛbaga jagɛlɛnw di u ma walisa k’u dɛmɛ. Bibulu bɛ o ɲɛminɛbagaw wele ko kiritigɛlaw. Josue de kɛra kiritigɛla fɔlɔ ye. Kiritigɛla minnu nana ale kɔfɛ, olu dɔw tɔgɔw filɛ: Otniɛl ni Ehud ni Samgar. Nka, o mɔgɔ minnu tun ye Israɛl dɛmɛ, fila tun bɛ u la minnu ye musow ye. O muso fila tɔgɔ ko Debora ani Jaɛl.

Debora tun ye kiramusoma ye. Fɛn minnu tun bɛna kɛ, Jehova tun bɛ olu fɔ a ye. Ale tun bɛ tila k’o lase jama ma. Debora tun ye kiritigɛla ye fana. A tun bɛ to ka sigi ntamarosun dɔ kɔrɔ. Mɔgɔw tun bɛ na u kunkow fɔ a ye yen, walisa ka dɛmɛ sɔrɔ.

O waati la, Jabin tun ye Kanan masakɛ ye. Kɛlɛkɛwotoro 900 tun b’a bolo. Fangaba tun bɛ a ka sɔrɔdasiw la, fo Israɛlka caman diyagoyara ka kɛ Jabin ka baaradenw ye. Masakɛ Jabin ka sɔrɔdasi kuntigi tun tɔgɔ ye ko Sisera.

 Don dɔ la, Debora ye ci bila Kiritigɛla Barak ma k’a fɔ a ye ko: ‘Jehova ko: “Cɛ 10 000 ta, i ka taa ni u ye Tabɔr kulu la. Ne bɛna Sisera lana i ma o yɔrɔ la. Ne bɛna u don i bolo. I bɛna se ale ni a ka sɔrɔdasiw la.” ’

Barak y’a fɔ Debora ye ko: ‘Ni i bɛ taa ne fɛ, ne na taa.’ Debora tugura a kɔ, u taara, nka, Debora y’a fɔ Barak ye ko: ‘Aw bɛna se aw juguw la, nka i tɔgɔ tɛna fɔ o sesɔrɔ la, bawo Jehova bɛna Sisera don muso dɔ de bolo.’ O de kɛra fana.

Barak jiginna ka bɔ Tabɔr kulu la walisa ka taa Sisera ka sɔrɔdasiw kunbɛn. Jehova sinna ka sanjiba lana. Sisera ka sɔrɔdasi caman tora ji la. Nka, Sisera yɛrɛ jiginna ka bɔ a ka wotoro kan, ka boli ka taa.

Waati dɔɔnin dɔrɔn o kɔfɛ, Sisera sera Jaɛl ka finiso la. Jaɛl y’a ladon a ka finiso kɔnɔ, ka nɔnɔ di a ma. O ye sunɔgɔ bila Sisera la. A ma mɛn dɔrɔn, Sisera sunɔgɔra. O la sa, bɔlɔ min bɛ kɛ ka finiso gengen, Jaɛl wulila ka o ta, ka o turu ni cɛ juguman kunkolo la ni marito ye. Kɔfɛ Barak sera Jaɛl ka so tuma min na, Jaɛl ye Sisera su jira Barak la. Debora ye min fɔ, o kɛra tiɲɛ na.

A laban na, masakɛ Jabin fana fagara. Israɛlkaw ye hɛrɛ sɔrɔ kokura, waati dɔ kɔnɔ.

Kiritigɛlaw 2:​14-22; 4:​1-24; 5:​1-31.