MUZE te A-Izalele akupwa mu kapalia, ayo te kakukololoka kuli Yehova. Yehova te kakwakumbulula ha kwaaha tusongwelo a hamu hanga aakwase. Mu Mbimbiliya kanaavuluka ngwo akwa kuyula. Mukwa kuyula mutangu te Yoshua, kulutwe lienyi yikwiza nawa akwo, majina jo te Oteniele, Ehude ni Shamgare. Alioze atu aali waze anakakwasa nawa Izalele, kali amwe mapwo waze anavuluka ngwo Debola ni Jaele.

Debola te profeta wa pwo. Yehova te kakumwaha maliji hakutwala ku yuma yize te muyiza kulutwe lia matangwa, nawa iye te kakwalweza kuli atu ngwo, yino ye Yehova amba. Debola kapwile nawa umwe mukwa kuyula. Iye te kakutwama mwishi lia yimwe yingaji ku milundu ya mu chifuchi, nawa atu te kakwiza kuli iye hanga a ehe ukwaso ku milonga yo.

Ha mashimbu jacho Jabini te mwanangana wa Kanana. Iye kapwile ni 900 a mashinyi a jita. Maswalele jenyi te kakwete tachi jinji, kashika A-Izalele anji anakaashinjila hanga apwe ngamba ja Jabini. Kapitau wa maswalele ja Jabini jina lienyi te Sisera.

Limwe tangwa, Debola yasanyika mukwa kuyula Mbarake, yamba kuli iye ngwenyi: ‘Yehova kanakwambe ngwo: “Yako hanga ukakungulule 10,000 a malunga ku mulundu wa Tabore. Yami mungukaneha Sisera kuli yena. Nawa Yami mungukakwaha kukumba hali iye ni hali maswalele jenyi.”’

Mbarake yamba kuli Debola ngwenyi: ‘Yami munguya nyi yena muoya hamwe ni yami.’ Debola yaya chimuwika ni iye, hohene iye yalweza Mbarake ngwenyi: ‘Yena uchi katambula lufuma wa kukumba, mumu Yehova makahana Sisera ku kwoko lia umwe pwo.’ Yino ye yapwile ko.

Mbarake yapalumuka ku mulundu wa Tabore hanga alitakane ni maswalele a Sisera. Hohene Yehova yatuhwisa umwe muhuji wa meya, hi maswalele anji ja Sisera yatoka mu meya. Alioze Sisera yasunuka mu mashinyi jenyi yachina.

Kulutwe lia amwe mashimbu Sisera yaheta ku mbalaka ya Jaele. Iye yamusanyika hanga anjile mu mbalaka, nawa yamwaha yamwa hanga anwe. Yino yinakamwaha tulo, mba iye yapomba. Hohene Jaele yanda lumbambo wa mbalaka yamuhata mu mutwe wa lunga yono mupi. Muze Mbarake ahetele, Jaele yamusolwela Sisera te hafwa kulu! Nyingika ngwo maliji waze Debola ahanjikile kali amwenemwene.

Hi kusongo, Mwanangana Jabini ni neye yamushaha, mba A-Izalele yapwa ni sambukila ha amwe mashimbu.