TUANBIA 50
Ralṭha Minu Pahnih
ISRAEL mi hna cu harnak an phanh tikah Jehovah sin ah bawmhnak an hal tawn. Jehovah nih anmah bawmh awk ah ralṭha mi hruaitu a pek tawn hna. Baibal nih cu hruaitu pawl cu biaceihtu tiah a ti hna i, Joshua cu hmasa bik biaceihtu a si. Amah hnu in biadceihtu cheukhat hna cu Othniel, Ehud le Shamkar an si. Sihmanhsehlaw Israel mi a rak bawm mi hna lak i nu pahnih hna cu Deborah le Jael an si.
Deborah cu profet a si. Jehovah nih hmailei a tlung hnga mi kong a chimh tawn i amah nih Israel mi hna cu Jehovah a chim mi cu a chimh ṭhan tawnhna. Deborah cu biaceihtu zong a si ve. Tlang ram ah khan ungkung pakhat tang ah a ṭhu i, mi hna cu an bia ceihpiak awk ah amah sin ah an ra tawn.
Cu lio caan ah cun Jabin cu Kanaan siangpahrang a si. Amah cu ral tuknak rangleng 900 a rak ngei. A ralkapbu cu an ṭhawng ngai i cucaah Israelmi tampi cu Jabin a sal ah canter an rak si. Siangpahrang Jabin a ralbawi ngan bik cu Sisera a si.
Nikhat cu Deborah nih Biaceihtu Barak kha a kawhter hna i: ‘Jehovah nih: “Mi 10,000 la hna law Tabor Tlang lei ah kalpi hna. Cuka ah cun Sisera kha na sin ah ka ratpi lai. Amah le a ralkap cung ah teinak kan pek lai,” an ti,’ tiah a chimh.
Barak nih: ‘Ka sin i na kal ve ah cun ka kal lai,’ tiah Barak cu a ti. Cucaah Deborah cu a rak kal ve, sihmanhsehlaw Barak sin ah cun: ‘Ral teinak ruang ah nang cu min ṭhatnak na hmu lai lo, zeicahtiah Jehovah nih Sisera cu nu pakhat kut ah a pek lai,’ a ti. Cun a chim bantuk in a rak si taktak.
Barak cu Tabor tlang in Sisera a ralkap pawl ton awk ah avung kal. Chikkhatte ah Jehovah nih tilian a tlunter i, an ralkap tampi cu ti chung ah an pil i an thi dih. Sihmanhsehlaw Sisera cu a rangleng in a ṭum i a zam.
Tlawmpal hnu ah Sisera cu Jael a thlam a hung phan. A thlam chung ah cun luh awk ah a sawm i, cawhnuk tlawmpal a pek. Cuhnu ah a mit a ku i, thu hluahmah in aa hngilh. Cutikah Jael nih puan thlam khenhnak fung zum aa lak i hi mi ṭhalopa lu ah a khenh. A hnu i Barak arat tik ah, mithipa Sisera cu amah kha a hmuhsak! Cucaah Deborah nih a chim mi cu a hmaan ti nan hngalh ko cang lai.
A donghnak ah siangpahrang Jabin zong cu thah a si ve i, Israel mi hna cu caan tlawmpal chung daihnak an rak ngei ṭhan.
Biaceihtu 2:14-22; 4:1-24 5:1-31.