AME ngöne la kola traqa la itre jole koi angetre Isaraela, angatr a treije ne sipo koi Iehova. Haawe, Iehova a hamëne koi angatr la itre taan ka catr matre troa xatua angatr. Tusi Hmitrötr a hën la itre taan cili ka hape, angetre amekötin. Iosua hi la pane atre amekötin, nge ame la itre xaa ka amekötin thupe i angeic, tre, Otheniela, me Ehuda, me Samegara. Ngo lue föe fe ka hane xatua Isaraela, Debora me Iaela la lue ëje i nyidro.

Ketre perofeta föe lae Debora. Hnei Iehova hna hamën koi eahlo la ketre ithuemacany thatraqan la itre drai ka troa traqa, nge thupene lai, hnei eahlo hna qaja la maca i Iehova kowe la nöj. Ketre atre amekötine fe Debora. E fene la ketre ipama la hnei eahlo hna lapa treqen la itre atr ka ajan troa iwai, matre isenyin la itre hnepe jol ka eje thei angatr.

Iabin la joxu ne Kanana ngöne la ijine cili. Hetrenyi thei angeic la 900 lao ikariota ne isi. Qa ngöne la ecatren la trongene isi i nyidrë, haawe, nyimutre la itretre Isaraela ka lapa fene la musi Iabin. Sisera la ëjen la taan ne isi i Iabin joxu.

Ame ngöne la ketre ijin, hnei Debora hna iupi troa thei Baraka ketre atre amekötin, me qaja koi angeic ka hape: ‘Hnei Iehova hna qaja ka hape: “Xome jë la 10 000 lao trahmany, ce tro jë me angatr kowe la wetre Tabora. Tro ni a e Sisera koi eö. Nge tro ni a nue angeic me trongene isi angeic, kowe la ime i eö.” ’

Kola qaja hnei Baraka koi Debora ka hape: ‘Tro ni a tro, e nyipoti fe a ce tro me eni.’ Debora a mejë me hane tro, ngo nyidroti pe a qaja koi Baraka ka hape: ‘Thaa tro kö a atrunyi nyipë hnene la hna ingaa ngöne la isi, ke tro Iehova a nue Sisera kowe la iwanakoime i föe.’ Ame hna traqa tune lai.

Ame hnei Baraka hna uti qa hune la wetr Tabora, matre troa itronyi memine la trongene isi Sisera. Ene pe Iehova a axulune pi la ketre di atraqatr, ame hna huj alön la itre sooc matre nyimu ka mec. Nge Sisera a uti qa hune la ikariota i angeic, me kötr.

Traqa ha Sisera ngöne la uma maano i Iaela. Ame hnei Iaela hna alö Sisera me hamë trepe ime i angeic melek. Ene pe canga traqa ju hi la pi meköl, nge hmuli zië ju hi angeic. Ame hnei Iaela hna xom la ketre fao ne uma maano memine la hama, me jenge ej ngöne la hnaqathë ne lai atr ka ngazo. Ame hë la kola traqa hnei Baraka, nyidroti a amaman koi angeic la ngönetrei i Sisera, a meci hë! Haawe, thaa tria ju kö lo hna ahnith hnei Debora.

Ketre ase fe hë hane humuthi Iabin joxu, matre tingetinge pë hë la mele i angetre Isaraela, ngöne itre hnepe ijin thupene lai.