ISRAƐLDENW tun mana gwɛlɛya sɔrɔ, u tun be kasi Jehova nɔfɛ. Jehova tun b’u jaabi a kɛtɔ ka kuntigi jagwɛlɛw ci u ma ka u dɛmɛ. Bibulu be o kuntigiw weele ko kititigɛlaw. Zozuwe kɛra kititigɛla fɔlɔ ye. Ale kɔ, Otiniyɛli, Eyudi ani Samugari fana kɛra kititigɛlaw ye. Nka mɔgɔ minw ye Israɛl dɛmɛ, olu la fila kɛra musow ye, u tɔgɔw ko Debora ni Yayɛli.

Debora tun ye kira musoman ye. Jehova tun be kunnafoniw di a ma sini koo la ani a tun be o fɔ jama ye. Debora kɛra kititigɛla ye fana. A tun be to ka sigi tamarosun dɔ kɔrɔ, ani jama tun be to ka taga a fɛ walisa k’u ka kitikow ɲɛnabɔ.

O wagati la, Yabin tun ye Kanaan masacɛ ye. Kɛlɛkɛwotoro 900 tun b’a fɛ. A ka kɛlɛbolo barika tun ka bon hali fɔɔ a ye Israɛlden dɔw waajibiya k’u kɛ a ka jɔɔnw ye. Yabin ka kɛlɛbolo kuntigi tɔgɔ tun ko Sizera.

Loon dɔ la, Debora ye cii bila ka kititigɛla Baraki weele k’a fɔ a ye ko: ‘Jehova ko: “I ka cɛɛ 10 000 ɲɛminɛ ka taga Tabɔri kulu kan. Ne bena a to Sizera n’a ka kɛlɛbolo ka na i kama yen. Ne bena a to i ka see sɔrɔ u kan.” ’

Baraki y’a fɔ Debora ye ko: ‘Ni ele fana be taga, ne bena taga.’ Debora tagara n’a ye, nka a y’a fɔ Baraki ye ko: ‘I tɛna tɔgɔ sɔrɔ kɛlɛ nin na, sabu Jehova bena Sizera don muso dɔ lo bolo.’ Ani o lo kɛra.

Baraki jigira ka bɔ Tabɔri kulu kan ka Sizera ka kɛlɛdenw kunbɛn. Yɔrɔnin kelen, Jehova y’a to sanjiba benna ani Sizera ka kɛlɛden caaman sara jii kɔnɔ. Nka, Sizera jigira ka bɔ a ka wotoro kɔnɔ ka boli.

Wagati dɔɔni o kɔ, Sizera sera Yayɛli ka fanibugu daa la. Yayɛli y’a fɔ a ye ko a ka don ani a ye nɔnɔ di a ma. O ye sinɔgɔ bila a la ani dɔɔni dɔrɔn a sinɔgɔra kosɔbɛ. U be lɔgɔ min kɛ ka fanibugu gwengwe, Yayɛli y’o dɔ ta k’a gwengwe cɛɛ jugu nin kungolo la. O kɔfɛ, Baraki sera tuma min na, Yayɛli ye Sizera suu yira a la! O cogo la, Debora tun ye min fɔ, o lo kɛra.

A laban, masacɛ Yabin fana fagara ani Israɛldenw ye hɛɛrɛ sɔrɔ wagati dɔ kɔnɔ.