SÜLATAPA kasa mojusü namüin na israeliitakana achuntushii nümüin Jeʼwaa süpüla nükaaliinjüin naya. Nuluwataaka Jeʼwaa wayuu meimmoluinsalii nekiipuʼuinjana. Josué nia chi palajachikai otta wanee nia Otniel, Ehúd otta Samgar. Eesü piamasü jieyuu akaaliinjaka na israeliitakana, Débora otta Jael nanülia.

Nünüikimaajatü Maleiwa Débora, nüküjüin Jeʼwaa sümüin tü alatajatkat mapeena süpüla süküjüin shia namüin na wayuukana. Ekiipuʼujana shia, aikalaʼawaisü suupünaa wanee alana süpüla sükaaliinjüin na wayuu antakana sünainmüin.

Wanaa sümaa tia, aluwataashi Jabín Canaán. 900 neʼejena, wainma maʼin nusurulaatse otta kojuya na israeliita nüchepchiakana. Sísara nünülia chi shikiipuʼukai na nusurulaatsekana.

Soʼu wanee kaʼi neenajünaka Barac sutuma Débora, sümaka nümüin: ‹Müshi Jeʼwaa: «Pümaa 10.000 tooloyuu eemüin tü uuchikat Tabor. Tantireechi pümüin Sísara. Pükanajeechi nia otta na nusurulaatsekana›».

Nümaka Barac sümüin Débora: ‹Puʼunule tamaa, oʼuneechi taya›. Suʼunaka Débora nümaa, sümaka nümüin: ‹Nnojoleerü yaletüin pünülia pükanajüle, süka ouktajachin Sísara sutuma wanee jierü naashin Jeʼwaa›. Ekeraajüsü tia.

Nüshakataka Barac saaʼujee tü uuchikat Tabor süpüla nüntiraain namaa nusurulaatse Sísara. Eejaaka wanee wüin miyoʼushaata nutuma Jeʼwaa, kojuyaka na wüinsitkana. Nüshakataka Sísara saaʼujee tü neʼejenakat nüpantajaaka.

Mapa nüntaka Sísara shipialuʼumüin Jael otta süsiʼraka nia leechi. Nutunkapa sutuma tü leechikat, saapaaka Jael wanee wunuʼu sünainjee tü shipiakat, sütkaka nikii. Nüntapa Barac shiiʼiyataka Sísara, ouktushi sutuma. Ekeraajüsü tü sümakat Débora.

Mapa nuʼutunaka aaʼin chi aluwataaikai Jabín, nnojoliika natkaain na israeliitakana süchikijee tia.