Ovakazendu vevari omapenda
EHUNGI 50
Ovakazendu vevari omapenda
INDU Ovaisrael tji va hita moumba, owo va urakana ku Jehova. Jehova we ve zira mokuvepa ovanane ozombanḓe okuvevatera. Ovanane mba Ombeibela i ve isana kutja ovapangure. Josua ongwa ri omupangure omutenga, nu tjiva wovapangure kombunda ye va ri Otniel, Ehud na Samgar. Nungwari vevari wovandu mba vatera Ovaisrael va ri ovakazendu womana Debora na Jael.
Debora omukazendu omuprofete. Jehova ee mu tjivisa mbi mavi katjitwa moruyaveze, nu okuzambo eye aa raere ovandu imbi Jehova mbya hungire. Debora wina omupangure. Eye aa haama kehi yevare mehi rozondundu, nu ovandu ave ya ku ye nomauzeu wawo.
Moruveze ndwi Jabin ongwa ri ombara yaKanaan. Eye wa ri nomatemba yovita 900. Ovarwe ve va ri nomasa tjinene ngandu Ovaisrael ovengi tji va ṋiṋikizwa okurira ovakarere vaJabin. Omuhongore omunene wotjimbumba tjovita tjombara Jabin wa ri nena Sisera.
Eyuva rimwe Debora wa isanisa omupangure Barak, ne mu raere kutja: ‘Jehova wa tja: “Toora ovarumendu 10 000 nu u ve tware kondundu Tabor. Ingo ami me hingi Sisera me ye kove. Nu Ami me ku pe ondoṋeno kombanda ye novarwe ve.”’
Barak wa raera Debora a tja: ‘Ami me i indu ove tji mo i puna ami wina.’ Debora wa ya puna ye, nungwari wa tja ku Barak: ‘Ohiviro youtoṋi movita kai nakurira oyoye, mena rokutja Jehova ma yandja Sisera meke romukazendu.’ Nu ihi otji tja tjitwa.
Barak wa heruka kondundu Tabor okukahakaena novarwe vaSisera. Tjimanga Jehova wa eta omupupo, nu ovengi vovarwe ovanavita va ṋiṋiwa. Nungwari Sisera wa heruka metemba re na tupuka pehi.
Kombunda yoruveze Sisera we ya kondanda yaJael. Eye we mu sekirisa mo ye, ne mu pe omaihi. Oyo ye mu koṱurisa, nu tjimanga eye wa rara ozomboṱu ozonḓeu. Okuzambo Jael wa toora omboha yondanda ne i tonene motjiuru tjomurumendu omuvi ngwi. Kombunda, Barak tje ya, eye we mu urikira Sisera ngwa koka! Mo munu nai kutja Debora mbya hungira, vya rira owatjiri.
Korusenina ombara Jabin ya zepewa wina, nu Ovaisrael va kara nohange rukwao oure woruveze handumba.
